नेपाल क्लियरिङ हाउस लिमिटेडको सञ्चालक समितिको अध्यक्षमा नेपाल राष्ट्र बैंकका कार्यकारी निर्देशक चेतप्रसाद उप्रेती नियुक्त भएका छन् । 

बिहीबारको औपचारिक कार्यक्रममा उनले डेपुटी गभर्नर बमबहादुर मिश्रसमक्ष अध्यक्ष पद तथा गोपनीयताको शपथ लिए ।  यसअघि उक्त पदमा कार्यकारी निर्देशक विश्रुत थापा रहेकी थिइन् ।  

उप्रेतीको केन्द्रीय बैंकको विभिन्न विभागमा २७ वर्षभन्दा बढी काम गरेको अनुभव छ भने उनले त्रिभुवन विश्वविद्यालयबाट एमबीए उत्तीर्ण गरेका छन् । हाल उनी राष्ट्र बैंकको गैरबैंक वित्तीय संस्था सुपरिवेक्षण विभागका कार्यकारी निर्देशकका रूपमा आबद्ध छन् । 

नेपाल क्लियरिङ हाउसको सञ्चालक समितिमा नेपाल राष्ट्र बैंक, वाणिज्य बैंक, विकास बैंक तथा वित्तीय कम्पनीबाट प्रतिनिधि रहेका छन् । 

एनसीएचएल नेपालमा राष्ट्रिय भुक्तानी प्रणाली स्थापना गर्न नेपाल राष्ट्र बैंक र बैंक तथा वित्तीय संस्थाद्वारा प्रवर्द्धित कम्पनी हो ।