०८ साउन २०८३, शुक्रबार
उच्च अदालतको आदेशले बुधबारमात्र जेलमुक्त भएका नेपाली कांग्रेसका नेता एवं पूर्वमन्त्री मो. अफताब आलमलाई मस्तिष्क घात भएको छ ।
मस्तिष्क घात भएपछि उनलाई शुक्रबार बिहान काठमाडौंको माइतीघरस्थित अन्नपूर्ण न्यूरो अस्पतालमा भर्ना गरिएको छ ।
मस्तिष्क घात भएर आलम आईसीयूमा भर्ना भएका अस्पताल स्रोतले जानकारी दियो । स्रोतका अनुसार उनलाई ‘ब्रेन स्ट्रोक’ भएको हो ।
आलम अस्पताल भर्ना भएपछि उनका समर्थकहरू अस्पताल पुगेका थिए ।
२०६४ सालको संविधानसभा निर्वाचनको पूर्वसन्ध्यामा भएको विस्फोटमा परी घाइते भएकालाई इँटाभट्टामा ज्यूँदै जलाएको आरोपमा आलम रौतहट जिल्ला अदालतको आदेशले थुनामा थिए ।
तर बुधबार उच्च अदालत जनकपुरको वीरगञ्ज इजलासले मान्छे जलाएको पुष्टि नहुने भन्दै आलमलाई रिहा गर्न आदेश दिएको थियो ।
अदालतको आदेश लगत्तै सोही दिन उनी रिहा भएका थिए । आलमलाई थुनामुक्त गर्ने आदेशको चर्को आलोचना भइरहेको छ ।
