०९ साउन २०८३, शनिबार
एयर इण्डियामा देखिएको संकट झनै चुलिएको छ । टाटा समूहले तीन वर्षअघि सञ्चालनमा ल्याएको यो राष्ट्रिय ध्वजावाहक कम्पनी यतिबेला अहिलेसम्मकै गम्भीर समस्या झेलिरहेको भारतीय सञ्चारमाध्यमले जनाएका छन् ।
मंगलबार कम्पनीले विभिन्न कारण देखाउँदै सात अन्तर्राष्ट्रिय उडान रद्द गरेको छ । यस्तै, सन फ्रान्सिस्कोबाट मुम्बईका लागि छुटेको उडानमा आएको प्राविधिक गडबडीका कारण यात्रुलाई बिचैमा जहाजबाट ओराल्नुपरेको बताइएको छ ।
एयर इण्डियाको पछिल्ला दिनहरूमा पटक–पटक उडान रद्द हुने, ढिलाइ हुने र प्राविधिक समस्या देखिने क्रम तीव्र बनेको छ । यात्रुहरूले उडान सुरक्षाप्रति प्रश्न उठाउन थालेका छन् ।
कम्पनीले समस्याको औपचारिक कारण भने सार्वजनिक गरिसकेको छैन । एयर इण्डिया यसअघि पनि बोइङ ७८७–८ ड्रीमलाइनर विमानको अभाव, सुरक्षा जाँच र एयर स्पेस सम्बन्धी मुद्दाका कारण चर्चामा आएको थियो ।
