काठमाडौं महानगरपालिका– ३२ पुरानो सिनामंगलस्थित पञ्चमुखी मार्गमा रहेको पाँचतले घरमा चिनियाँ नागरिकको अस्वाभाविक गतिविधि देखेपछि स्थानीयले प्रहरीलाई सुराक दिए ।

सुराक उपलब्ध गराउने व्यक्तिले भनेका थिए, ‘बाटैदेखि ठूल्ठूला सीसीटीभी राखिएको छ । एयरपोर्ट पूरै देखिने सीसीटीभीमार्फत चिनियाँ नागरिकले अवैध गतिविधि गरिरहेका छन् ।’

उक्त सूचना पहिल्याउँदै काठमाडौं उपत्यका अपराध अनुसन्धान कार्यालयले मंगलबार साँझ सो घरमा छापा मार्‍यो ।

पाँच तले घर । भुइँतलादेखि नै इलेक्ट्रिक समान छरपस्ट पारिएको । विभिन्न कम्पनीहरू (डेल, लेनेभो, एसर) का ल्यापटपमा लाग्ने ब्याट्री, लोगो बनाउने मशिन, प्याकेजिङ गर्ने मशिन, ब्याट्री बनाउन प्रयोग हुने कच्चा पदार्थ र नौ किसिमका सीसीटीभी क्यामेरा तथा क्यामेरा बनाउने सामानहरू थुपारिएको देखेपछि छापा मार्न पुगेका प्रहरी चकित परे ।

स्थानीय शिवहरि भट्टराईले मासिक २ लाख रुपैयाँ लिने गरी चिनियाँ नागरिक जेनीसँग सम्झौता गरेका थिए ।

प्रहरी पुग्दा त्यहाँ अर्का चिनियाँ नागरिक यु वाङ थिए । उनी सामान मिलाउँदै थिए ।

प्रहरीका अनुसार चिनियाँ नागरिकले ७/८ जना नेपाली किशोरकिशोरीलाई मासिक १० देखि १५ हजार तलब दिएर सामान प्याकेजिङ, लेबिलङको काम लगाउँदै आएको देखियो ।

बिजनेस भिसामा आएका यु र जेनीले २०८० देखि भट्टराईको घर भाडामा लिएका थिए ।

प्रहरीले सोधपुछ गर्दा ‘रेसिडेन्सियल’ उद्देश्यले नै भाडामा लिने बताएपछि आफूले मासिक दुई लाख लिने गरी सम्झौता गरेको भट्टराईले बताएका छन् ।

भट्टराईले जेनीसँग घरभाडा सम्झौता गरेका थिए । जेनी अहिले चीन पुगिसकेकी छन् ।

अनुसन्धान कार्यालयका प्रहरी उपरीक्षक (एसपी) अंगुर जिसी र डीएसपी अनिल घिमिरेसहितको टोली घरमा छापा मार्न पुगेको थियो ।

‘भित्र पुग्दा त ‘ब्रान्डेड’ कम्पनीको लोगो टाँसिएको ब्याट्री र सीसीटीभीहरूको खात देखियो,’ एसपी जिसीले लोकान्तरसँग भने, ‘चीनबाट कच्चा पदार्थ नेपाल ल्याउने र यहाँ ल्याएपछि प्राविधिक दक्षताका आधारमा ब्याट्री र सीसीटीभी बनाउने गरेका रहेछन् ।’

जिसीका अनुसार तत्कालै त्यहाँ भेटिएका वाङलाई सामानहरूको बिल/भरपाई देखाउन आग्रह गर्दा उनले देखाउन सकेनन् । वाङले आफू पनि काम गर्न बसेको र यसको व्यवस्थापन जेनीले गर्दै आएको प्रहरीले बयानमा खुलाएका छन् ।

प्रहरीले उक्त घरबाट ल्यापटपको तयारी ब्याट्री तीन हजार एक सय ४९ वटा, सीसीटीभी ब्याट्री ७४८ वटा, सीसीटीभी बनाउन प्रयोग हुने सामान ११ हजार ९ सय पाँचवटा कच्चा पदार्थ बरामद गरेको छ ।

त्यस्तै, विभिन्न नाम चलेका ब्रान्डको लोगो तयार पार्ने मशिनहरू समेत प्रहरीले बरामद गरेको छ ।

‘कसैसँग अनुमति नलिई विभिन्न ब्रान्डका ल्यापटपका ब्याट्री र सीसीटीभी बनाएको देखियो,’ एसपी जिसीले भने, ‘राजस्व छली गरेको देखिएपछि सबै बरामद सामान र व्यक्तिलाई राजस्व अनुसन्धान विभाग पठाइएको छ ।’

नेपालमा साइबर अपराध, बैंकको एटीएम ह्याक, अवैध कल सेन्टर सञ्चालन गरेर बस्ने चिनियाँ नागरिकहरूलाई प्रहरीले यसअघि नै पक्राउ गरी सार्वजनिक गरिरहेको छ ।

हाल पक्राउ परेका वाङ र फरार भनिएकी जेनीले आधिकारिक कम्पनीसँग स्वीकृति नलिई चीनबाट कच्चा पदार्थ ल्याएर ल्यापटपका ब्याट्री र सीसीटीभी क्यामेरा बनाएर बिक्री गरेको यो नौलो घटना हो ।

एसपी जिसी भन्छन्, ‘यस्तो धन्दा अन्य ठाउँमा पनि होला, हामी खोज्दैछौं । हाल पक्राउ परेका वाङ एक्लैको संलग्नता नहुन सक्छ ।’

बरामद सामाग्रीहरूलाई नगरप्रहरीको तीनवटा ट्रकमा राखेर वाङसहित राजस्व अनुसन्धान विभागमा बुझाइसकिएको छ । प्रहरीसँग भने अहिले वाङबाहेक अरू चिनियाँ नागरिक सम्पर्कमा आएका छैनन् ।