भारतको राजस्थानस्थित झालावाड जिल्लाको मनोहर प्रहरी चौकी क्षेत्रमा रहेको सरकारी विद्यालयको छत भत्किँदा तीन बालबालिकाको मृत्यु भएको छ । दुर्घटनामा कम्तीमा ३० जना घाइते भएको बीबीसी हिन्दीले जनाएको छ । 

समाचारअनुसार राजस्थानका शिक्षामन्त्री मदन दिलावरले तीन बालबालिकाको मृत्युको पुष्टि गरेका छन् । जबकि मिडिया रिपोर्टहरूमा मृतक बालबालिकाको संख्या कम्तीमा पाँच रहेको बताइएको छ ।

शिक्षामन्त्री मदन दिलावरद्वारा जारी विज्ञप्तिमा भनिएको छ, 'विद्यालयको छत भत्किँदा दुःखद घटना भएको छ । तीन बालबालिकाको घटनास्थलमै मृत्यु भएको छ। कलेक्टरसहित शिक्षा विभागका अधिकारीहरूलाई पठाइएको छ।'

दुर्घटनालगत्तै गाउँलेहरूले घाइते र मृत बालबालिकालाई भग्नावशेषबाट बाहिर निकालेका थिए । घाइतेहरूमा शिक्षकहरू पनि छन् । हाल सबैलाई उपचारको लागि अस्पताल लगिएको समाचारमा उल्लेख छ ।