मेक्सिकोले अमेरिकी राष्ट्रपति डोनाल्ड ट्रम्पले ल्याटिन अमेरिकी लागूऔषध गिरोहमाथि कारबाहीका लागि पेन्टागनलाई निर्देशन दिएको समाचार सार्वजनिक भएपछि आफ्नो भू–भागमा अमेरिकी सेना प्रवेश नगर्ने स्पष्ट जनाएको छ ।

शुक्रबार राष्ट्रपति क्लाउडिया शेइनबामले ‘संयुक्त राज्य अमेरिका मेक्सिकोमा सेना लिएर आउने छैन । हामी सहकार्य गर्छौं, समन्वय गर्छौं, तर कुनै आक्रमण हुने छैन । यसलाई पूर्ण रूपमा अस्वीकार गरिन्छ’, भनेकी छन् ।

द न्यूयोर्क टाइम्सका अनुसार ट्रम्पले गोप्य रूपमा विदेशी भूमिमा सैन्य शक्ति प्रयोग गर्न निर्देशनमा हस्ताक्षर गरेका छन् । ह्वाइट हाउसले सो निर्देशनबारे प्रत्यक्ष टिप्पणी नगरे पनि ट्रम्पको शीर्ष प्राथमिकता ‘स्वदेशको सुरक्षा’ रहेको जनाएको छ ।

यसअघि ट्रम्पले आठ लागूऔषध गिरोहलाई औपचारिक रूपमा ‘आतंकी समूह’ घोषणा गर्ने कार्यकारी आदेशमा हस्ताक्षर गरेका थिए, जसमा छ वटा मेक्सिकन समूह थिए । शेइनबामका अनुसार मेक्सिको सरकारले सो आदेश आउने जानकारी पाए पनि त्यसमा कुनै सैनिक संलग्नता नहुने स्पष्ट गरिएको थियो ।

‘यो कुनै सम्झौतासँग सम्बन्धित छैन । जब पनि यसबारे कुरा उठ्छ, हामीले सधैं ‘होइन’ भनेका छौं’, उनले भनिन् । यसअघि उनले ट्रम्पको यो निर्णय अमेरिकाले आफ्नो सार्वभौमिकतामा हस्तक्षेप गर्ने अवसर हुन नहुने बताएकी थिइन् ।

अमेरिकी विदेश सचिव मार्को रुबियोका अनुसार सो घोषणा भएपछि खुफिया निकाय र रक्षा विभागमार्फत गिरोहमाथि कारबाही गर्न सहज हुने छ । उनले गिरोहलाई केवल लागूऔषध कारोबार गर्ने नभई सशस्त्र आतंकी संगठनका रूपमा व्यवहार गर्नुपर्ने बताएका छन् ।

द न्यूयोर्क टाइम्सका अनुसार ट्रम्पको निर्देशनले समुद्रमा र विदेशी भूमिमा समेत गिरोहविरुद्ध प्रत्यक्ष सैन्य कारबाहीको औपचारिक आधार प्रदान गर्छ ।

हालका महिनामा मेक्सिको र अमेरिकाबीच अवैध आप्रवासी तथा लागूऔषधको प्रवेश रोक्न सहकार्य भएको छ । अमेरिकी सीमाशुल्क तथा सीमा सुरक्षा विभागका तथ्यांकअनुसार यस वर्ष जुन महिनामा सीमा नाकाबाट हुने प्रवेशको संख्या अहिलेसम्मकै न्यून थियो । गत हप्तामात्र अमेरिकी राजदूत रोनाल्ड जोनसनले फेन्टानिल बरामद आधाभन्दा बढी घटेको बताएका थिए ।