इङ्ल्यान्डका चर्चित क्रिकेटर स्टुअर्ट ब्रोडले आफ्नो समयका प्रभावशाली भारतीय खेलाडी युवराज सिंहद्वारा हस्ताक्षर गरिएको जर्सी रद्दीको टोकरीमा फालेको रहस्य खुलेको छ । यो रहस्य स्टुअर्ट ब्रोडका पिता क्रिस ब्रोडले खोलेका हुन् । क्रिस ब्रोड पनि आफ्नो समयका चर्चित खेलाडी र प्रभावशाली आईसीसी म्याच रेफ्री हुन् ।

सन् १९८६–८७ सिजनको एशेज शृंखला इङ्ल्यान्डलाई जिताउन क्रिस ब्रोडको भूमिका महत्वपूर्ण रहेको थियो । क्रिस ब्रोडले द टेलीग्राफसँगको कुराकानीका क्रममा युवराज सिंहको प्रसंग झिकेका हुन् ।

‘युवराज सिंहले हस्ताक्षर गरेको जर्सी क्रिसमसको अवसरमा मैले स्टुअर्टलाई उपहारस्वरूप दिएको थिएँ । मैले दिएको उपहार हेरेपछि उसले त्यसलाई रद्दीको टोकरीमा लगेर फालिदियो । सायद, उसको पुरानो घाउ अझै पुरिएको थिएन,’ क्रिस ब्रोडले भनेका छन् ।

खासमा, युवराज सिंहले नै एक खेलका क्रममा स्टुअर्ट ब्रोडकै बलमा लगातार ६ वटा छक्का प्रहार गरेका थिए । त्यही रिस पछिसम्म पनि स्टुअर्ट ब्रोडमा बाँकी रहेको उनको पिताको बुझाइ छ ।

यो घटना सन् २००७ को आईसीसी टी–२० विश्वकपका क्रममा भएको थियो । इङ्ल्यान्ड र भारतबीच खेलिएको खेलका क्रममा युवराज सिंहले स्टुअर्ट ब्रोडलाई लगातार ६ बलमा ६ छक्का हिर्काएका थिए ।

त्यो खेलमा भारत विजयी भएको थियो भने युवराज सिंहले केवल १६ बलमा सात छक्का र तीन चौकाको मद्दतले ५८ रन बनाएका थिए । स्टुअर्ट ब्रोडले चार ओभरमा ६० रन खर्चिएका थिए ।

त्यतिबेला स्टुअर्ट ब्रोडको खेलजीवन भर्खरै अगाडि बढ्दै थियो। युवराज सिंहले आफ्नो छोराको ओभरमा लगातार ६ छक्का प्रहार गरेपछि क्रिस ब्रोडले नै युवराज सिंहसँग अटोग्राफ लिएका थिए ।

‘हो, युवराज सिंहसँग त्यो अटोग्राम मैले नै लिएको थिएँ । मैले भारतीय टोलीको जर्सीमा त्यो अटोग्राफ लिएको थिए । त्यतिबेला मैले युवराज सिंहलाई तिमीले मेरो छोराको खेलजीवन नै समाप्त गरिदियौं भनेर पनि भनेको थिएँ,’ क्रिस ब्रोडले त्यो क्षणको सम्झना गरेका छन् ।

त्यो जर्सीमा युवराज सिंहले यस्तो लेखेका थिए, ‘मैले पनि एकै ओभरमा पाँचवटा छक्का खाएको छु । त्यसैले यतिबेला म तिम्रो पीडालाई राम्ररी अनुभव गरिरहेको छु । तिमी इङ्ल्यान्डको क्रिकेटको सुनौलो भविष्य हौ । म तिम्रो सुखद भविष्यको कामना गर्छु ।’

द टेलीग्राफसँगको कुराकानीमा क्रिस ब्रोडले सोही घटनाको चर्चा गरेका हुन् । युवराज सिंहले भनेजस्तै भविष्यमा स्टुअर्ट ब्रोड इङ्ल्यान्डको क्रिकेटमा नायकका रुपमा उदाए । उनले अन्तर्राष्ट्रिय क्रिकेटमा देशका लागि आठ सय ४७ विकेट लिए ।

स्टुअर्ट ब्रोडले टेस्ट क्रिकेटमा ६ सय चार, एकदिवसीय अन्तर्राष्ट्रिय क्रिकेटमा एक सय ७८ र टी–२० अन्तर्राष्ट्रिय क्रिकेटमा ६५ विकेट लिएका छन् ।