०९ साउन २०८३, शनिबार
एक चर्चित महिला क्रिकेटरले आफूमाथि यौन दुर्व्यवहार भएको भनी लगाएको आरोपको विषयमा छानबिन गर्न बंगलादेश क्रिकेट बोर्ड (बीसीबी)ले उच्चस्तरीय समिति गठन गरेको छ ।
बंगलादेशको राष्ट्रिय क्रिकेट टोलीकी पूर्वकप्तान जहाँआरा आलमले छनोट समितिका पूर्वअध्यक्ष मंजरुल इस्लामले आफूमाथि यौन दुर्व्यवहारको गम्भीर आरोप लगाएकी छन् ।
छानबिन समितिलाई १५ दिनभित्र प्रतिवेदन बुझाउन निर्देशन दिइएको छ । जहाँ आराले पत्रकार रियासाद अजिमलाई लिएको अन्तरवार्तामा आफूमाथि यौन दुर्व्यवहार भएको आरोप लगाएकी थिइन् ।
‘मंजरुल इस्लामले पटक–पटक यौन दुर्व्यवहा गरेका छन् । उनी अनावश्यक रूपमा मेरो काँधमा हात राख्थे। मसँग अनावश्यक र गलत कुरा पनि गर्थे । धेरैपटक अँगालो पनि हालेका छन् । उनको यस्तो गतिविधिले मलाई असहज महसुस हुन्थ्यो,’ अन्तरवार्ताका क्रममा उनले भनेकी छन् ।
आफूमाथि भएको गलत व्यवहारको विषयमा बीसीबीका पूर्वनिर्देशक शफिउल इस्लाम नादेल र बोर्डका प्रमुख कार्यकारी अधिकृत निजामुद्दिन चौधरीसँग गुनासो गरेको पनि जहाँआराले बताएकी छन् ।
पूर्वकप्तान जहाँआराको आरोपलाई आफूहरूले गम्भीर रूपमा लिएको बीसीबीले जनाएको छ । ‘यो निकै गम्भीर विषय हो । त्यसैले यौन उत्पीडनको आरोपको विषयमा छानबिन गर्न समिति बनाएको छौँ,’ बीसीबीद्वारा जारी विज्ञप्तिमा भनिएको छ ।
जहाँआराले बंगलादेशका लागि ५२ एकदिवसीय अन्तर्राष्ट्रिय र ८३ टी–२० अन्तर्राष्ट्रिय खेलेकी छन् । उनले एकदिवसीयमा ४८ र टी–२० अन्तर्राष्ट्रियमा ६० विकेट लिएकी छन् ।
