१९ असार २०८३, शुक्रबार
सिन्धुलीको हरिहरपुरगढी गाउँपालिका- २ झनझनेबाट स्रोत नखुलेको १५ लाख रुपैयाँसहित ४ जना पक्राउ परेका छन् । एक चिनियाँ नागरिकसहित उनीहरूलाई प्रहरीले मंगलबार दिउँसो पक्राउ गरेको हो ।
पक्राउ पर्नेहरूमा काठमाडौं महानगरपालिका- ३१ बस्ने २५ वर्षीय आदिल हमिद, २१ वर्षीय आमी अमिद, रौतहट गुजरा नगरपालिका- २ बस्ने ७३ वर्षीय चन्द्रमान योञ्जन र चिनियाँ नागरिक ३२ वर्षीय सिओङ चाङये रहेका छन् ।
प्रहरी चौकी झनझनेबाट खटिएको प्रहरीले सिन्धुलीबाट काठमाडौंतर्फ जाँदै गरेको बा प्र ०१-०३१ च ५८०४ नम्बरको गाडीमा सवार उनीहरूलाई पक्राउ गरेको हो ।
प्रहरीले दिएको जानकारीअनुसार चेकजाँचका क्रममा गाडीको पछाडि साइडमा राखिएको टायर भित्र लुकाई छिपाई राखिएको उक्त नगद बरामद भएको थियो । त्यसपछि चालक आदिल र गाडीमा सवार आमी, चन्द्रमान र सिओङ चाङयेलाई प्रहरीले पक्राउ गरेको हो ।
थप अनुसन्धान भइरहेको प्रहरीले जनाएको छ ।
