२५ जेठ २०८३, सोमबार
धनुषाको मिथिला बिहारी नगरपालिका– ९ का वडाध्यक्ष विन्देश्वर यादवको हत्या पुरानो रिसइबीका कारण भएको प्रहरी अनुसन्धानले देखाएको छ ।
विन्देश्वरलाई गोली प्रहार गर्ने शम्भु यादव अहिले प्रहरीको नियन्त्रणमा छन् ।
गाउँमै एक व्यक्तिको मरणको १३ दिने श्राद्धमा भोज खान पुगेका वडाध्यक्ष विन्देश्वरसहितको समूह र शम्भुको समूहबीच शुक्रबार झडप भएको थियो ।
विन्देश्वर गुहार माग्न हिँडिरहेका बेला शम्भुले घरभित्रबाट कटुवा पेस्तोल निकालेर छातीमै प्रहार गरेको प्रहरीले जनाएको छ ।
शम्भु नेपाल प्रहरीमा कार्यरत सहायक हवल्दार हुन् । सप्तरीस्थित प्रहरी चौकी पकरीमा कार्यरत उनी पाँच दिन घरबिदा लिएर धनुषा आएका थिए ।
गाउँमा बन्दै गरेको धर्मशालाको उपभोक्ता समितिमा क–कसलाई राख्ने भन्ने विवाद पहिल्यैदेखि थियो ।
२०७९ मा सम्पन्न स्थानीय तहको निर्वाचनमा स्वतन्त्र उम्मेदवार बनेर वडाध्यक्षमा जितेका विन्देश्वरले उपभोक्ता समितिमा मनपरी सदस्य राखेपछि उनीहरूबीच रिसइबी बढेको प्रहरीले जनाएको छ ।
विन्देश्वर पछि एमालेमा प्रवेश गरेका थिए । विन्देश्वर श्राद्धको भोजमा पुगेपछि योजनाअनुसार नै उनीमाथि कुटपिट भएको थियो ।
शम्भुसहित अन्दुपट्टीका राजकुमार यादव, धर्मनाथ यादव र इन्दल यादवले विन्देश्वरलाई कुटपिट गर्न थालेपछि दोहोरो झडप भएको थियो ।
‘विन्देश्वर त्यहाँबाट उम्किएर गुहार माग्दै गरेका बेला शम्भुले घर भित्रबाट कटुवा पेस्तोल निकाली छातीमा प्रहार गरेका थिए,’ जिल्ला प्रहरी कार्यालयका धनुषाका एक अनुसन्धान अधिकृतले लोकान्तरसँग भने, ‘झडप भएको स्थान र शम्भुको घर डेढ सय मिटरको दुरीमा छ । शम्भुले योजनाबद्ध ढंगले नै विन्देश्वरको हत्या गरेको प्रारम्भिक अनुसन्धानले देखाएको छ ।’
गोली लागि घाइते भएका विन्देश्वरलाई प्रादेशिक अस्पताल जनकपुरमा पुर्याए पनि चिकित्सकले मृत घोषित गरेका थिए । घटनामा अन्दुपट्टीकै रामवरण यादव, दीपेन्द्र यादव, राजकिशोर यादव र अभिनाषकुमार यादव घाइते भएका छन् ।
प्रहरीले शम्भुसँगै धर्मनाथ कुमार यादव, अनिकेत यादव र मनोज कुमार यादवलाई पक्राउ गरेको छ ।
शम्भुको घरबाट कटुवा पेस्तोल, एक राउन्ड गोली र एक राउन्ड खोका बरामद भएको छ ।
धनुषाका प्रहरी प्रमुख एवं प्रहरी उपरीक्षक (एसपी) रुगम कुँवरका अनुसार शम्भुलाई प्रदेश २–०२–००१ च ०३४२ नम्बरकोे एम्बुलेन्समा भाग्दै गरेको अवस्थामा पक्राउ गरिएको हो ।
झडपमा शम्भु पनि घाइते भएका थिए । उनको न्यूरो अस्पताल जनकपुरमा प्रहरी निगरानीमा उपचार भइरहेको छ । शम्भुसँग प्रहरीले बयान लिने तयारी गरेको छ ।
घाइतेमध्येका रामवरणको प्रादेशिक अस्पताल जनकपुरमा उपचार सम्भव नभएपछि थप उपचारका लागि ललितपुरको ग्वार्कोस्थित बीएन्डबी अस्पताल ल्याइएको छ ।
धनुषा प्रहरीका प्रवक्ता एवं प्रहरी नायब उपरीक्षक (डीएसपी) गणेशबहादुर बममा अनुसार वडाध्यक्ष विन्देश्वरमाथि योजनाबद्ध ढंगले आक्रमण गरिएको थियो ।
‘शम्भु र विन्देश्वरबीच पहिला पनि विवाद भएको पाइयो,’ डीएसपी बमले भने, ‘स्थानीयसँग बुझ्दा गाउँको बाटो र धर्मशाला निर्माणका लागि बनाइएको उपभोक्ता समितिको विषयमा विवाद भएको पाइयो ।’
