०९ साउन २०८३, शनिबार
बलियो प्रतिद्वन्द्वी इटालीलाई उसैको घरेलु मैदानमा स्तब्ध पार्दै नर्वे आगामी फिफा विश्वकपमा छनोट भएको छ । छनोट प्रतियोगिताको सोमबार बिहान सम्पन्न अन्तिम खेलमा नर्वेले इटालीलाई ४–१ गोलले हरायो ।
नर्वे युरोपेली क्षेत्रको छनोट प्रतियोगिताको समूह ‘आई’बाट विश्वकपमा पुगेको हो । आठवटै खेलमा विजयी भएको नर्वे २४ अंकसहित तालिकाको पहिलो स्थानमा रह्यो । इटाली भने समान खेलबाट १८ अंक बटुल्दै दोस्रो भयो ।
आगामी विश्वकपमा छनोट हुन इटालीले अब अन्तरमहादेशीय प्ले–अफ खेल्नु पर्नेछ । नर्वेको सजिलो जितमा एर्लिङ हालान्डले दुई मिनेटभित्र दुई गोलको योगदान गरे । खेलमा शुरूआती अग्रता भने इटालीले लिएको थियो ।
खेल शुरू भएको ११ औं मिनेटमै पियो एस्पोसिटोले गोल गरेका थिए । सोही गोलका कारण घरेलु टोली इटाली पहिलो हाफमा अगाडि रह्यो । त्यसपछि दोस्रो हाफमा नर्वेले खेलमा उत्कृष्ट पुनरागमन गरेको थियो । नर्वेका लागि ६३ औं मिनेटमा एन्टोनियो नुसाले पहिलो गोल गरेका थिए ।
त्यसपछि खेलको ७८ औं र ७९ औं मिनेटमा स्टार खेलाडी हालान्डले लगातार दुई गोल गर्दै नर्वेलाई ३–१ को अग्रता दिलाएका थिए । दोस्रो हाफको इन्जुरी समयमा नर्वेका लागि जोर्गेन स्ट्रान्ड लार्सनले चौथो गोल थपरेका थिए ।
नर्वे २८ वर्षपछि फिफा विश्वकपमा छनोट भएको हो । नर्वेले यसअघि सन् १९९८ मा विश्वकप खेलेको थियो । समग्रमा नर्वे चौथो पटक विश्वकपमा छनोट भएको हो । इटाली भने चारपटकको विश्वकप विजेता हो ।
इटालीले पछिल्लो पटक सन् २००६ मा विश्वकपको उपाधि चुमेको थियो । तर, इटाली यसअघि लगातार दुईपटक विश्वकपमा अनुपस्थित थियो । इटालीको टोली सन् २०१८ र सन् २०२२ को विश्वकपमा छनोट हुन सकेको थिएन ।
नर्वे युरोपेली क्षेत्रबाट आगामी विश्वकपमा छनोट हुने पाँचौं राष्ट्र हो । युरोपबाट इङ्ल्यान्ड, फ्रान्स, क्रोएसिया र पोर्चुगल पनि आगामी विश्वकपमा छनोट भइसकेका छन् ।
फिफा विश्वकपको २३ औं संस्करण सन् २०२६ मा अमेरिका, मेक्सिको र क्यानडामा संयुक्त रूपमा आयोजना हुँदैछ ।
