१७ असार २०८३, बुधबार
झापाको दमकस्थित इलाका प्रहरी कार्यालयमा जेनजी आन्दोलनका क्रममा लुटिएका २ थान हतियार र गोलीगठ्ठा पाँचथरमा फेला परेका छन् । उक्त घटनामा संलग्न रहेको आरोपमा प्रहरीले एक जनालाई पक्राउ गरेको छ ।
गत भदौ २४ गते इलाका प्रहरी कार्यालय दमकमा तोडफोड, आगजनी र प्रहरीको हातहतियार लुटपाट गरी फरार रहेका व्यक्तिहरूको खोजी गर्ने क्रममा प्रहरीले विशेष सूचनाका आधारमा मंसिर २ गते दिउँसो करिब १:३० बजे पाँचथरको मिक्लाजुङ गाउँपालिका-३ बस्ने २२ वर्षीय सुशील फियाक (लिम्बु)लाई पक्राउ गरेको हो ।
प्रारम्भिक सोधपुछका क्रममा फियाकले हतियारहरू पाँचथरको मिक्लाजुङ गाउँपालिका-३ आरुबोटे लामागाउँस्थित एउटा ओडारमा लुकाई छिपाई राखेको बताएका थिए ।
त्यसपश्चात् जिल्ला प्रहरी कार्यालय पाँचथरसँग समन्वय गरी प्रहरी निरीक्षक नवीन राईको कमान्डमा खटिएको प्रहरी टोलीले हातहतियार तथा गोलीगठ्ठा बरामद गरेको हो ।
म्याग्जिनसहितको ३०३ मार्क ३ राइफल १ थान र म्याग्जिन नभएको बट र ह्यान्ड ग्रिप जलेको अवस्थामा रहेको इन्सास राइफल १ थान बरामद भएको प्रहरीले जनाएको छ ।
यस्तै, इन्सासको जंगी राउण्ड १ थान र एसएलआरको जंगी राउण्ड थान नियन्त्रणमा लिएको झापा प्रहरीले जनाएको छ ।
पक्राउ परेका सुशील फियाक (लिम्बु)लाई हातहतियार तथा खरखजाना सम्बन्धी कसुरमा इलाका प्रहरी कार्यालय दमकबाट थप अनुसन्धान तथा कारबाहीको प्रक्रिया अगाडि बढाइएको प्रहरीले जनाएको छ ।
