नेपाल प्रिमियर लिग (एनपीएल) क्रिकेटको सोमबार जारी पहिलो खेलमा विराटनगर किङ्सले जनकपुर बोल्ट्सलाई जितका लागि एक सय ३६ रनको लक्ष्य दिएको छ ।

कीर्तिपुरस्थित अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको विराटनगरले निर्धारित ओभरमा सात विकेट गुमाएर एक सय ३५ रन बनाएको हो ।

विराटनगरका लागि पाँचौं नम्बरमा क्रिज समाल्न आएका शुभम रन्जनेले ३७ रनको योगदान गरे । उनले २९ बलको सामना गरी दुई छक्का र दुई चौका पनि हिर्काए ।

बसिर अहमदले पनि ३६ रन बनाए । चौथो नम्बरमा क्रिज समाल्न आएका उनले ३५ बलको सामना गरी तीन छक्का हिर्काए ।

विराटनगरका माथिल्ला तीन ब्याट्सम्यानले गतिलो प्रदर्शन गर्न सकेनन् । ओपनर लोकेश बमले टोलीको खातामा २८ रन थपे । उनले २६ बलमा एक छक्का र दुई चौका प्रहार गरे ।

अर्का ओपनर जर्ज मुन्सी सात बलमा दुई चौकाको मद्दतले १० रन बनाउँदै आउट भए । अनुभवी मार्टिन गप्टिल पनि १३ रनभन्दा अगाडि बढ्न सकेनन् । उनले १५ बलमा एक चौका हिर्काए ।

नारायण जोशी दुई रनमै आउट भए । मर्चेन्ट डे लाङ्गे शून्य रनमै पेभेलियन फर्किए । प्रतिस जीसी दुई र र सन्दीप लामिछाने शून्य रनमा अविजित रहे । विराटनगरले अतिरिक्त रुपमा सात रन पायो ।

जनकपुर बोल्ट्सका बलर रुपेश सिंह र संगित कुरेले दुई–दुई विकेट लिए । आदित्य महताले पनि एक विकेट हात पारे ।

जारी प्रतियोगितामा विराटनगरले आफ्नो तेस्रो खेल खेलेको हो । विराटनगर यसअघि दुबै खेलमा विजयी भएको छ । आफ्नो दोस्रो खेल खेलेको जनपुर भने अघिल्लो खेलमा पराजित भएको थियो ।