१२ साउन २०८३, मंगलबार
संयुक्त अरब इमिरेट्स (यूएई)मा जारी एसीसी पुरुष यू–१९ प्रिमियर कप क्रिकेट प्रतियोगितामा नेपालले विजयी शुरूआत गरेको छ ।
मंगलबार भएको आफ्नो पहिलो खेलमा नेपालले साउदी अरेबियालाई आठ विकेटको फराकिलो अन्तरले पराजित गरेको हो ।
पहिले ब्याटिङ गरेको साउदी अरेबियाले निर्धारित ५० ओभरमा नौ विकेट गुमाएर दुई सय १८ रन बनाएको थियो ।
जवाफी ब्याटिङमा ओर्लिएको नेपाली टोलीले भने ३०.४ ओभरमै केवल दुई विकेट गुमाएर विजय लक्ष्य पूरा गर्यो ।
नेपालको जितमा ओपनर ब्याट्सम्यान निरज कुमार यादवले उत्कृष्ट शतकीय पाली खेले । उनले एक सय १४ रन बनाए ।
निरजले यसक्रममा केवल ९० बलको सामना गरी एक छक्का र १३ चौका हिर्काए । तेस्रो नम्बरमा क्रिज समाल्न आएका निश्चल क्षेत्रीले पनि अविजित ६६ रनको योगदान गरे ।
निश्चलले ७३ बलको सामना गरी एक छक्का र पाँच चौका हिर्काए । अर्का ओपनर वंश क्षेत्रीले पनि ३० रन बनाए । उनले २० बलमा एक छक्का चार चौका प्रहार गरे । सिबरिन श्रेष्ठ एक रनमा अविजित रहे ।
प्रतियोगितामा १४ टोली सहभागी छन् । सहभागी टोलीलाई चार समूहमा विभाजन गरिएको छ । नेपाल प्रतियोगिताको समूह ‘ए’ मा परेको छ । उक्त समूहमा हङकङ पनि छ ।
नेपालले आफ्नो दोस्रो खेल बिहीबार हङकङसँग खेल्नेछ । यो प्रतियोगिताबाट तीनवटा टोली आगामी एसीसी यू–१९ एसिया कपमा छनोट हुनेछन् ।
