भारतीय प्रधानमन्त्री नरेन्द्र मोदीले भारतले वर्ष २०२५ मा ३५७ लाख टन खाद्यान्न उत्पादन गरी ऐतिहासिक रेकर्ड बनाएको बताएका छन् । यो उपलब्धिलाई उनले देशको कृषि क्षेत्रको महत्त्वपूर्ण प्रगतिको रूपमा वर्णन गरेका छन् ।

मासिक रेडियो कार्यक्रम ‘मन की बात’को १२८ औं संस्करणमार्फत राष्ट्रलाई सम्बोधन गर्दै प्रधानमन्त्री मोदीले गत दशकमा भारतको खाद्यान्न उत्पादन १० करोड टनले बढेको बताए । खाद्य सुरक्षा र आत्मनिर्भरता हासिल गर्न भारतले स्थिर गतिको प्रगति गरिरहेको उनले बताए ।

'भारतले कृषि क्षेत्रमा उल्लेखनीय सफलता हासिल गरेको छ । अहिले देशको खाद्यान्न उत्पादन ३५७ लाख टन पुगेको छ । दस वर्षअघिसँग तुलना गर्दा यस अवधिमा खाद्यान्न उत्पादन १० करोड टनले बढेको छ,' प्रधानमन्त्री मोदीले भने ।

कोयम्बटोरमा आयोजना गरिएको नेचुरल फार्मिङ प्रदर्शनीको स्मरण गर्दै उनले प्राकृतिक खेतीमा युवा पुस्ताको आकर्षण प्रशंसनीय रहेको बताए ।

'म दक्षिण भारतमा प्राकृतिक खेती प्रवर्द्धनका लागि भइरहेको प्रयासबाट निकै प्रभावित भएँ । धेरैजसो दक्ष र उच्च शिक्षित युवाहरू अहिले प्राकृतिक खेतीतर्फ आकर्षित भइरहेका छन्,' प्रधानमन्त्री मोदीले भने ।

यसअघि नोभेम्बर १९ मा मोदीले ‘पीएम–किसान सम्मान निधि’को २१ औं किस्ता वितरणसँगै तामिलनाडुको कोयम्बटोरमा प्राकृतिक खेती प्रदर्शनी उद्घाटन गरेका थिए । सो क्रममा उनले स्थानीय किसानहरूसँग अन्तरक्रिया गरेका थिए र विभिन्न कृषि उत्पादन तथा बालीको वृद्धि देखाइएको प्रदर्शनी अवलोकन गरेका थिए । प्रधानमन्त्रीसँगै तामिलनाडुका राज्यपाल आर.एन. रवी पनि सहभागी थिए ।

दक्षिण भारत प्राकृतिक खेती सम्मेलन २०२५ नोभेम्बर १९ देखि २१ सम्म तामिलनाडु नेचुरल फार्मिङ स्टेकहोल्डर्स फोरमको आयोजनामा कोयम्बटोरमा सम्पन्न भएको थियो । सम्मेलनको उद्देश्य दिगोपनामा आधारित, वातावरणमैत्री र रसायनमुक्त खेती प्रवर्द्धन गर्ने तथा प्राकृतिक र पुनर्जीवनशील कृषि मोडेललाई भारतको भविष्यमुखी, जलवायु–सम्वेदनशील र आर्थिक रूपमा टिकाउ कृषि प्रणालीका रूपमा अघि बढाउने थियो ।

सम्मेलनले किसान समूह र ग्रामीण उद्यमीहरूलाई बजारसँग जोड्ने उपाय, जैविक सामग्री, प्रशोधन, वातावरणमैत्री प्याकेजिङ र स्थानीय प्रविधिमा भएका नवीनता प्रदर्शन गर्ने विषयमा पनि केन्द्रित थियो ।