नेपाल प्रिमियर लिग (एनपीएल)को जारी दोस्रो संस्करणमा सुदूरपश्चिम रोयल्स अपराजित यात्रा कायम राख्दै ‘क्वालिफायर’मा पुगेको छ । 

त्रिवि अन्तर्राष्ट्रिय क्रिकेट मैदानमा बिहीबार साँझ भएको खेलमा चितवन राइनोजलाई ४९ रनले हराउँदै सुदूरपश्चिमले ‘क्वालिफायर’मा स्थान पक्का गरेको हो । 

सुदूरपश्चिमले अहिलेसम्म खेलेका ६ वटै खेल जितेको छ । लिग चरणमा अपराजित रहेको सुदूरपश्चिम १२ अंकसहित अंक तालिकाको शीर्षस्थानमा आसिन छ । 

अहिलेसम्म खेलेका ६ खेलमध्ये चार हार बेहोरेको चितवनको दुई जितसहित चार अंक छ । 

सुदूरपश्चिमले दिएको १७० रनको लक्ष्य पछ्याउने क्रममा चितवन १२० रनमै समेटियो । चितवनका लागि रवि बोपाराले सर्वाधिक २९ रन बनाए । उनले २३ बलमा एक चौका र दुई छक्का प्रहार गरे । 

त्यस्तै, देव खनालले २८, अर्जुन साउँदले १६ र कुशल मल्लले १५ रन बनाए । अन्य खेलाडीले दोहोरो अंक जोड्न सकेनन् । 

सुदूरपश्चिमका लागि पुनित मेहराले दुई, दीपेन्द्रसिंह ऐरी, हिक्मत महरा, अविनाश बोहरा र इशान पाण्डेले एक/एक विकेट लिए। 

पहिले ब्याटिङ गरेको सुदूरपश्चिमले चार विकेटको क्षतिमा एक सय ६९ रन बनाएको थियो । 

सुदूरपश्चिमका लागि ओपनर क्रिस लिनले सर्वाधिक ७५ रन बनाए । उनी रिटाइर्ड हर्ट भए । लिनले ५६ बलमा ५ चौका र ३ छक्का प्रहार गरे ।

ओपनर विनोद भण्डारी २१, इशान पाण्डे १, पुनिट मेहरा १३, हर्मित सिंह १ रनमा आउट भए । कप्तान दीपेन्द्रसिंह ऐरी र आरिफ शेख दुवै २४–२४ रनमा अविजित रहे । 

बलिङमा चितवनका सैफ जैबले २, रञ्जित कुमार र जर्ज स्क्रिम्शले एक/एक विकेट लिए । 

चितवनलाई हराउँदै सुदूरपश्चिम पहिलो ‘क्वालिफायर’मा पुग्दा विराटनगर किंग्सको पनि ‘प्लेअफ’मा स्थान सुरक्षित भएको छ । विराटनगर लिग चरणका ६ मध्ये दुई खेलमा हार र चार खेलमा जितसहित आठ अंक बटुलेर तेस्रो स्थानमा छ ।