०५ साउन २०८३, मंगलबार
नेपाल प्रिमियर लिग (एनपीएल) क्रिकेटअन्तर्गत शनिबारको पहिलो खेलमा सुदूरपश्चिम रोयल्सले विराटनगर किङ्सलाई जितका लागि एक सय ४८ रनको लक्ष्य दिएको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको सुदूरपश्चिम रोयल्सले निर्धारित ओभरमा ६ विकेट गुमाएर एक सय ४७ रन बनायो ।
सुदूरपश्चिम रोयल्सका लागि इशान पाण्डे र आरिफ शेखले उत्कृष्ट प्रदर्शन गरे । दुवै ब्याट्सम्यानले तेस्रो विकेटका लागि ७२ रनको साझेदारी गरे ।
तेस्रो नम्बरमा क्रिज समाल्न आएका इशानले टोलीका लागि ३८ रनको योगदान गरे । उनले ३५ बलको सामना गरी दुई छक्का र दुई चौका हिर्काए ।
चौथो नम्बरमा क्रिज समाल्न आएका आरिफले पनि टोलीको खातामा अविजित ४५ रन थपे । आरिफले केवल ३२ बलमा तीन छक्का र एक चौका प्रहार गरे ।
सुदूरपश्चिमले २५ रनको कुल स्कोरमा पहिलो र ४२ रनमा दोस्रो विकेट गुमाएको थियो । त्यसपछि इशान र आरिफले टोलीको स्कोरलाई एक सय १४ रनको स्थितिसम्म डोर्याएका थिए ।
ओपनर ब्याट्सम्यान विनोद भण्डारी १३ बलमा तीन चौकाको मद्दतले १५ रन बनाउँदै आउट भए । अर्का ओपनर जोस ब्राउनले २५ बलमा दुई छक्का र एक चौकाको मद्दतले २४ रन जोडे ।
पाँचौं नम्बरमा क्रिज समाल्न आएका हरमित सिंह खाता खोल्नुअघि नै पेभेलियन फर्किए । कप्तान दीपेन्द्रसिंह ऐरीले केवल ११ बलमा दुई छक्काको मद्दतले १९ रन बनाए ।
विराटनगर किङ्सका बलर सन्दीप लामिछानेले तीन विकेट लिए । विराटनगरको कप्तानसमेत रहेका प्रभावशाली लेग–स्पिनर सन्दीपले चार ओभरमा केवल २० रन खर्चिए ।
सन्दीप जारी सिजनको एनपीएलमा सबैभन्दा बढी विकेट लिने बलरको सूचीमा पहिलो स्थानमा आसीन छन् । उनले सात खेलमा १५ विकेट लिइसकेका छन् ।
प्रतिश जीसीले पनि सुदूरपश्चिमका एक ब्याट्सम्यानलाई पेभेलियन फर्काए । प्रतिशले आफ्नो पहिलो ओभरको पहिलो बलमै विकेट लिए । बसिर अहमदले पनि एक विकेट कुम्ल्याए ।
