११ साउन २०८३, सोमबार
विश्वकै सर्वाधिक लोकप्रिय फ्रेन्चाइज क्रिकेट प्रतियोगितामध्येको एक हो, भारतमा आयोजना हुने इन्डियन प्रिमियर लिग (आईपीएल) ।
आईपीएलको आगामी संस्करणको अक्सन (खेलाडी खरिद–बिक्री प्रक्रिया)का लागि भारतीय क्रिकेट कन्ट्रोल बोर्ड (बीसीसीआई) ले अन्तिम सूची पनि सार्वजनिक गरिसकेको छ ।
विश्वकै सर्वाधिक लोकप्रिय फ्रेन्चाइज प्रतियोगिता भए पनि यसपटक केही चर्चित विदेशी खेलाडीले आईपीएललाई आफ्नो रोजाइमा पारेका छैनन् ।
विश्व क्रिकेटका केही प्रभावशाली खेलाडीले त आईपीएल छाडेर पाकिस्तान सुपर लिग (पीएसएल) मा आबद्ध हुने निर्णयसमेत लिएका छन् ।
यसका अतिरिक्त केही चर्चित खेलाडीले अन्य कारण देखाउँदै आईपीएलको आगामी संस्करण नखेल्ने निर्णय पनि लिएका छन् ।
त्यसैमध्येका एक हुन्, इङ्ल्यान्डका प्रभावशाली अलराउन्डर मोइन अली । उनले आईपीएलको आगामी संस्करण नखेल्ने निर्णय लिएका छन् ।
यसपटक आईपीएलभन्दा पीएसएल उनको रोजाइमा परेको छ । उनले सामाजिक सञ्जालमार्फत पनि यसको पुष्टि गरिसकेका छन् ।
उनले आईपीएलको अघिल्लो संस्करण कोलकाता नाइट राइडर्सबाट खेलेका थिए । उनले हालसम्म आईपीएलमा ७३ खेल खेल्दै कुल एक हजार एक सय ६७ रन बनाएका छन् । आईपीएलमा उनले ४१ विकेट पनि लिएका छन् ।
यसैगरी, दक्षिण अफ्रिकाका प्रभावशाली खेलाडी फाफ डु प्लेसिसले पनि आईपीएलको आगामी सिजनमा सहभागिता नजनाउने भएका छन् ।
उनी पनि आईपीएल छाडेर पीएसएलतर्फ लागेका हुन् । उनले आईपीएल छाडेर पीएसएलतिर लाग्ने निर्णय लिनु आफ्ना लागि निकै कठिन भएको बताएका छन् ।
दक्षिण अफ्रिकाका यी प्रभावशाली खेलाडी हाल नेपाल प्रिमियर लिग (एनपीएल) खेलिरहेका छन् । उनी विराटनगर किङ्सका महत्त्वपूर्ण सदस्य हुन् ।
फाफ डु प्लेसिसले चेन्नई सुपर किङ्स र रोयल च्यालेन्जर्स बेंगलुरुबाट आईपीएल खेलेका छन् । उनले आईपीएलमा कुल चार हजार सात सय ७३ रन बनाएका छन् ।
अस्ट्रेलियाका आक्रामक ब्याट्सम्यान ग्लेन म्याक्सवेलले पनि आईपीएलको आगामी संस्करण नखेल्ने निर्णय लिएका छन् ।
प्रभावशाली अलराउन्डर म्याक्सवेलले कुनै कारण नै नदिई आईपीएलको अक्सनबाट आफ्नो नाम फिर्ता लिएको समाचारमा जनाइएको छ । उनले यसअघि आईपीएलमा थुप्रै महत्त्वपूर्ण पाली खेलेका छन् ।
चर्चित क्यारेबियन अलराउन्डर आन्द्रे रसेलले पनि सन् २०२६ को आईपीएल नखेल्ने भएका छन् । कोलकाता नाइट राइडर्सका पूर्वखेलाडी रसेलले आईपीएलबाट सन्न्यास लिएको बताएका छन् ।
उनी खेलाडीको भूमिकामा नभए पनि अन्य भूमिकामा आईपीएलमा देखा पर्ने सम्भावना भने छ ।
उनले आईपीएलको एक सय ४० खेलमा कुल दुई हजार ६ सय ५१ रन बनाएका छन् । उनले आईपीएलमा एक सय २३ विकेट पनि लिएका छन् ।
