११ साउन २०८३, सोमबार
अफ्रिका कप अफ नेसन्स फुटबल प्रतियोगितामा इजिप्टले सुखद शुरूआत गरेको छ ।
इजिप्टले मंगलबार बिहान सम्पन्न आफ्नो पहिलो खेलमा जिम्बाब्वेमाथि २–१ गोलको रोमाञ्चक जित हासिल गर्यो ।
इजिप्टको प्रतिस्पर्धात्मक जितमा प्रभावशाली खेलाडी मोहमद सलाहले निर्णायक गोल गरे । इङ्लिस प्रिमियर लिग क्लब लिभरपुलका अनुभवी खेलाडी सलाहले खेलको अन्त्यतिर गोल गरेका थिए ।
खेलमा शुरूआती अग्रता भने जिम्बाब्वेले लिएको थियो । खेल शुरू भएको २०औं मिनेटमा जिम्बाब्वेका लागि प्रिन्स डुबेले गोल गरेका थिए । सोही गोलका कारण पहिलो हाफमा जिम्बाब्वे अगाडि रह्यो ।
निर्धारित समयको ६४ औं मिनेटमा इजिप्टका लागि ओमर मार्मुसले जवाफी गोल गरेका थिए । उनी म्यानचेस्टर सिटीबाट व्यवसायीक फुटबल खेल्छन् । खेल प्रतिस्पर्धात्मक रूपमा अघि बढिरहँदा इन्जुरी समयको पहिलो मिनेटमा सलाहले निर्णायक गोल गरे ।
प्रतियोगिताको समूह ‘बी’ मा तीन अंकसहित इजिप्ट पहिलो स्थानमा छ । समान खेलबाट तीन अंक जोडेको दक्षिण अफ्रिका तालिकाको दोस्रो स्थानमा छ । दक्षिण अफ्रिकाले भने आफ्नो पहिलो खेलमा एन्गोलालाई २–१ गोलले हराएको हो ।
