२९ असार २०८३, सोमबार
तान्जानियाको किलिमञ्जारो हिमालमा हेलिकप्टर दुर्घटना हुँदा पाँच जनाको मृत्यु भएको छ । तान्जानिया नागरिक उड्डयन प्राधिकरणले उक्त दुर्घटनाको पुष्टि गरेको छ ।
प्राधिकरणका अनुसार बुधबार किलिमञ्जारो हिमालको बाराफु क्याम्प नजिक हेलिकप्टर दुर्घटनाग्रस्त भएको थियो । दुर्घटनामा एक जना स्थानीय गाइड र एक जना चिकित्सक (दुवै तान्जानियाली), हेलिकप्टर चालक जिम्बाब्वेका नागरिक तथा चेक गणतन्त्रका दुई जना पर्यटकको मृत्यु भएको तान्जानिया नेशनल पार्क्सले विज्ञप्तिमार्फत जनाएको छ ।
स्थानीय सञ्चारमाध्यम ‘म्वानान्ची’ र ‘इस्ट अफ्रिका टिभी’ले किलिमञ्जारो क्षेत्रीय प्रहरी प्रमुखलाई उद्धृत गर्दै दुर्घटनाग्रस्त हेलिकप्टर चिकित्सकीय उद्धार (मेडिकल रेस्क्यु) अभियानमा संलग्न रहेको जनाएका छन् ।
म्वानान्चीका अनुसार दुर्घटना समुद्री सतहबाट ४ हजार ६ सय ७० देखि ४ हजार ७ सय मिटर उचाइको बीचमा भएको हो ।
अफ्रिकाको सबैभन्दा अग्लो हिमाल मानिने किलिमञ्जारोको उचाइ करिब ६ हजार मिटर रहेको छ। प्रत्येक वर्ष करिब ५० हजार पर्यटक किलिमञ्जारो आरोहण गर्ने गर्छन् ।
