०८ असार २०८३, सोमबार
मोरङमा गाँजा ओसारपसारमा संलग्न समूहलाई नियन्त्रणमा लिन प्रहरीले मध्यरातमा हवाई फायर गर्नुपरेको छ ।
नेपाल–भारत सीमा क्षेत्र नजिकबाट ३३० केजी गाँजासहित दुई जना भारतीय नागरिक समेत पक्राउ परेका प्रहरीले जनाएको छ ।
शनिबार राति करिब १०:३० बजेतिर जहदा गाउँपालिका–२ तारिगामा गाँजा ओसारपसार भइरहेको सूचना पाएपछि जिल्ला प्रहरी कार्यालय मोरङका इन्स्पेक्टर सरोज खनालको नेतृत्वमा टोली परिचालन गरिएको थियो ।
टोली घटनास्थलमा पुग्दा टाउकोमा गाँजाको बोरा बोकेर भारततर्फ लैजाँदै गरेको देखिएको प्रहरीको भनाइ छ । प्रहरीलाई देख्नासाथ कारोबारी गाँजाको बोरा फालेर फरार हुन खोजेपछि नियन्त्रणका लागि प्रहरीले एक राउण्ड हवाई फायर गरेको थियो ।
हवाई फायरपछि प्रहरीले भारतको अररिया चन्दामोहनका २४ वर्षीय अबुल हसन र ३० वर्षीय सोहेल खानलाई पक्राउ गरेको छ ।
उनीहरूको साथबाट ३३० केजी गाँजा बरामद गरिएको छ । पक्राउ परेका दुवै जनालाई बरामद गाँजासहित जिल्ला प्रहरी कार्यालय मोरङमा राखी थप अनुसन्धान भइरहेको छ ।
मोरङ प्रहरी प्रमुख, एसपी कवित कटवालले गाँजा ओसारपसारकै क्रममा हवाई फायर गरी दुई जना भारतीय नागरिकलाई पक्राउ गरिएको जानकारी दिए ।
उनका अनुसार पक्राउ परेकामाथि लागूऔषध ऐनअन्तर्गत मुद्दा चलाउने तयारी भइरहेको छ ।
पूर्वी पहाडी जिल्लामा उत्पादन हुने गाँजा सुरक्षाकर्मीलाई छलेर भारत पुर्याउने प्रयास भइरहेका छन् । भारतमा गाँजाको मूल्य दोब्बर पर्ने भएकाले अवैध रूपमा तस्करी हुने गरेको प्रहरीको भनाइ छ ।
