०६ साउन २०८३, बुधबार
नेपाल विद्यालय खेलकुद महासंघ (एनएसएसएफ)द्वारा काठमाडौँमा आयोजित एनएसएसएफ १३औं किन्डर ओलम्पिक मंगलबार सम्पन्न भएको छ ।
त्रिपुरेश्वरस्थित दशरथ रंगशालामा भएको कार्यक्रमको दोस्रो चरणमा ६७ विद्यालयका करिब एक हजार ६ सय विद्यार्थी सहभागी भएको आयोजकले जनाएको छ ।
दशरथ रंगशालामै भएको पहिलो चरणको किन्डर ओलम्पिकमा उपत्यकाका विभिन्न ३४ विद्यालयका एक हजार पाँच सय ४० विद्यार्थी सहभागी थिए ।
सहभागीहरूको मार्चपासपछि पूर्वसांसद् माधव सापकोटाले ओलम्पियन भारोत्तोलक कमलबहादुर अधिकारीलाई किन्डर ओलम्पिकको टर्च हस्तान्तरण गरेका थिए ।
कमलसँगै ओलम्पियन एथलेटिक्सकी सन्तोषी श्रेष्ठ, तेक्वान्दोकी आयशा शाक्य र कबड्डीकी मानमति विष्टले ओलम्पिक टर्चलाई दशरथ रंगशालाको ट्रयाकमा परिक्रमा गराएका थिए ।
पहिलो चरणमा पनि यी चार खेलाडीले नै ओलम्पिक टर्चलाई ट्रयाकमा परिक्रमा गराएका थिए । कार्यक्रममा राष्ट्रिय सभाका अध्यक्ष नारायणप्रसाद दाहालको शुभकामना सन्देश प्रशारण गरिएको थियो भने पहिलो चरणको कार्यक्रमको संक्षिप्त श्रव्यदृष्य पनि प्रस्तुत गरिएको थियो ।
किन्डर ओलम्पिकमा विभिन्न १२ खेलको प्रतिस्पर्धा भएको थियो । बालबालिकाका लागि मनोरञ्जनात्मक प्रदर्शन पनि राखिएको थियो ।
एनएसएसएफका महासचिव राजकुमार कार्कीले उत्साहजनक सहभागितामा कार्यक्रम सफलतापूर्वक सम्पन्न गर्न सहयोग पुर्याउने सबैप्रति आभार व्यक्त गरे । उनले आगामी संस्करण अझ भव्य रूपमा आयोजना गर्ने प्रतिबद्धता जनाए ।
पुस १२ गते भएको पहिलो चरणको कार्यक्रमको सभामुख देवराज घिमिरेले उद्घाटन गरेका थिए । यसअघि पुस ४ गते शीतल निवासमा आयोजित कार्यक्रममा राष्ट्रपति रामचन्द्र पौडेलले किन्डर ओलम्पिकको मस्कट अनावरण गर्नुका साथै एनएसएसएफका अध्यक्ष विनोद श्रेष्ठलाई ओलम्पिक टर्च हस्तान्तरण गरेका थिए ।
सानै उमेरदेखि बालबालिकालाई खेलकुदप्रति आकर्षित गर्ने उद्देश्यले सन् २०१२ मा ईसीईटीएले किन्डर ओलम्पिकको सुरुआत गरेको थियो ।
