२९ असार २०८३, सोमबार
एन्फा राष्ट्रिय लिग फुटबल प्रतियोगितामा शनिबार तीनवटा खेल खेलिने छ । पहिलो खेल चित्लाङ फुटबल क्लब र नव जनजागृति युवा क्लबबीच खेलिने छ ।
चित्लाङ र नव जनजागृति क्लबबीचको खेल १२ बजे ललितपुरको सातदोबाटोस्थित एन्फा कम्प्लेक्स मैदानमा शुरू हुनेछ ।
काठमाडौँको चित्लाङ एफसी र सिमराको नव जनजागृति एन्फा प्रेसिडेन्ट लिगमा उत्कृष्ट प्रदर्शन गर्दै एन्फा राष्ट्रिय लिगमा छनोट भएका हुन् ।
एन्फा प्रेसिडेन्ट लिगको सेमिफाइनलमा चित्लाङ फुटबल क्लबले नव जनजागृति युवा क्लबलाई पराजित गरेको थियो ।
यसैगरी, शनिबारको दोस्रो खेल घरेलु फुटबलका दुई प्रभावशाली टोली त्रिभुवन आर्मी क्लब र मनाङ मर्स्याङ्दी क्लबबीच खेलिने छ ।
विभागीय टोली त्रिभुवन आर्मी क्लब र मनाङ मर्स्याङ्दी क्लबबीचको खेल दिउँसो १४:०० बजे त्रिपुरेश्वरस्थित दशरथ रंगशालामा शुरू हुनेछ ।
त्रिभुवन आर्मी क्लब पछिल्लो ‘ए’ डिभिजन लिगमा सातौं स्थानमा रहेको थियो । आर्मी क्लबले २६ खेलबाट ३४ अंक जोडेको थियो ।
यसैगरी, गर्विलो इतिहास बोकेको मनाङ मर्स्याङ्दी क्लबले पनि पछिल्लो ‘ए’ डिभिजन लिगमा गतिलो प्रदर्शन गर्न सकेको थिएन । मनाङ मर्स्याङ्दी लिगमा आठौं भएको थियो ।
यसैगरी, शनिबारको तेस्रो खेल प्लानिङ ब्वाइज युनाइटेड र नेपाल पुलिस क्लबबीच खेलिने छ । यो खेल साँझ १८:३० बजे दशरथ रंगशालामा सुरु हुनेछ ।
प्लानिङ ब्वाइज क्लब यसै वर्ष भएको सहिद स्मारक ‘बी’ डिभिजन लिगबाट बढुवा हुँदै ‘ए’ डिभिजन लिगमा उक्लिएको हो । ‘बी’ डिभिजन लिगमा प्लानिङ ब्वाइज च्याम्पियन बनेको थियो ।
विभागीय क्लब नेपाल पुलिस क्लब भने पछिल्लो सहिद स्मारक ‘ए’ डिभिजन लिग तालिकामा तेस्रो स्थानमा रहेको थियो ।
