२० असार २०८३, शनिबार
डीएन्डडी एमेच्योर गल्फ च्याम्पियनसिपको उपाधि राहुल विश्वकर्माले जितेका छन् । राहुलले सोमबार दोस्रो तथा अन्तिम चरणमा चार अन्डर ६६ को उत्कृष्ट कार्डका साथ समग्रमा दुई अन्डर एक सय ३८ स्कोर गरे ।
उनले प्रकृत तामाङ र सुन्दर राईलाई नौ स्ट्रोकको फराकिलो अन्तरले पछि पारे । राहुलले नगद ५० हजार रुपैयाँ पुरस्कार पनि प्राप्त गरे । नेपाली एमेच्योर गल्फरले कुनै पनि प्रतियोगितामा नगद पुरस्कार प्राप्त गरेको पहिलो पटक हो ।
प्रकृत र सुन्दर राईले समग्रमा सात ओभर एक सय ४७ को प्रदर्शन गरे । काउन्ट ब्याकमा प्रकृत दोस्रो भए । प्रकृतले सोमबार तीन अन्डर ६७ को स्कोर बनाए । उनले ३० हजार रुपैयाँ नगद पुरस्कार प्राप्त गरे ।
तेस्रो भएका सुन्दरले अन्तिम दिन चार ओभर ७४ को प्रदर्शन गरे । उनले २४ हजार रुपैयाँ नगद पुरस्कार पाए । राम तामाङले कूल आठ ओभर एक सय ४८ को प्रदर्शनसहित चौथो स्थान हासिल गरे । उनले २० हजार रुपैयाँ पुरस्कार पाए ।
राजेश राईले कुल एक सय ४९ स्कोरसहित पाँचौं भएर १६ हजार रुपैयाँ पुरस्कार हात पारे । सुमन भुजेल, गजेन्द्र लिम्बू र पदम हाङ लिम्बूले समान एक सय ५१ स्कोर गरे । काउन्ट ब्याकमा सुमन छैटौं, गजेन्द्र सातौं र पदम आठौं भए । उनीहरूले क्रमशः १४ हजार, १३ हजार र १२ हजार रुपैयाँ पुरस्कार पाए ।
दीपेन्द्र राई र देउकुमार राईले समान एक सय ५२ स्कोर गरे । काउन्ट ब्याकमा दीपेन्द्र नवौं र देउकुमार १०औं भए । दीपेन्द्रले ११ हजार र देउकुमारले १० हजार पुरस्कार प्राप्त गरे । विजयी खेलाडीलाई देउकुमार राई र दीपेन्द्र राईले पुरस्कार वितरण गरे ।
सह–प्रायोजक देउकुमार राईले कम्तीमा पाँच वर्षसम्म प्रतियोगितालाई निरन्तरता दिने बताए । उनले आगामी संस्करणमा पुरस्कार राशी बढाइने र विजेताले कम्तीमा ८० हजार रुपैयाँ प्रदान गर्ने जानकारी दिए ।
अर्का सह–प्रायोजक दीपेन्द्र राईले नेपाल गल्फ संघ र धरान गल्फ क्लबसहित सबै सरोकारवालाप्रति आभार व्यक्त गर्दै एमेच्योर गल्फरको हितका लागि प्रतियोगिता आयोजना गरिएको र यसलाई आगामी दिनमा पनि निरन्तरता दिने प्रतिबद्धता जनाए ।
