०९ साउन २०८३, शनिबार
पोखरामा जारी एनसेल टाइगर कप महिला तथा पुरुष भलिबल प्रतियोगिताको पहिलो दिन शुक्रबार पुरुषतर्फको खेलमा सशस्त्र प्रहरी बलको एपीएफ क्लबले गण्डकी प्रदेश भलिबल संघलाई ३–१ सेटले हराएको छ ।
अत्यन्तै प्रतिस्पर्धात्मक खेलको पहिलो सेटमा एपीएफ क्लब २६–२४ अंकले अगाडि रह्यो । दोस्रो सेटको नतिजालाई पनि एपीएफ क्लबले २७–२५ अंकले आफ्नो पक्षमा पार्यो ।
तेस्रो सेटको नतिजालाई भने गण्डकी प्रदेश भलिबल संघले २५–१९ अंकले आफ्नो पक्षमा पार्यो । चौथो सेटको नतिजालाई २५–२१ अंकले आफ्नो पक्षमा पार्दै एपीएफ क्लबले खेल ३–१ सेटले जित्यो ।
त्यसअघि, पुरुषतर्फकै खेलमा अर्को विभागीय टोली त्रिभुवन आर्मी क्लबले जित हात पारेको थियो । आर्मी क्लबले माल्दिभ्सलाई ३–० सेटले हराएको थियो ।
खेलको प्रारम्भदेखि नै आर्मी क्लबले माल्दिभ्सलाई दबाबमा राखेको थियो । आर्मी क्लबले २५–१५, २५–२२ र २५–१० अंकले नतिजा आफ्नो पक्षमा पारेको थियो ।
यसैगरी, शुक्रबार नै पोखरा रंगशालाको भलिबल कोर्टमा सम्पन्न महिलातर्फको खेलमा टिप टप न्यु डायमण्ड स्पोर्ट्स क्लब विजयी भएको थियो ।
टिप टप न्यु डायमण्ड स्पोर्टस क्लबले त्रिभुवन आर्मी क्लबलाई ३–० को सोझो सेटमा हरायो । न्यु डायमण्डले आर्मी क्लबलाई २५–१३, २६–१६ र २५–८ अंकले हराएको हो ।
प्रतियोगिताको महिलातर्फ पाँच र पुरुषतर्फ ६ टोलीको सहभागिता रहेको छ । महिलातर्फ न्यु डायमण्ड, आर्मी, नेपाल पुलिस क्लब, एपीएफ क्लब र थाइल्याण्ड क्विन्स सहभागी छन् ।
पुरुषतर्फ नेपाल पुलिस क्लब, त्रिभुवन आर्मी क्लब, एपीएफ क्लब, गण्डकी प्रदेश भलिबल संघ, पर्वत जिल्ला भलिबल संघ र माल्दिभ्सको टोली सहभागी छन् ।
