टी–२० विश्वकप २०२६ को पाँचौं खेल अर्थात् आफ्नो पहिलो खेलमा नेपालले इङ्ल्यान्डविरुद्ध पावरप्लेमा दुई विकेट गुमाएर ४७ रन बनाएको छ । 

इङ्ल्यान्डले दिएको १८५ रनको विजयी लक्ष्य पच्छाउने क्रममा नेपालले ओपनरद्वय आसिफ शेख र कुशल भुर्तेललाई गुमाएको हो । भारतको मुम्बईस्थित वानखेडे रंगशालामा भइरहेको खेलमा नेपालका ओपनर कुशल भुर्तेल १७ बलमा २९ रन बनाएर आउट भए भने आसिफ शेख ९ बलमा ७ रन बनाएर आएट भए । 

टस जितेर पहिला ब्याटिङ रोजेको इङल्यान्डले निर्धारित २० ओरभमा सात विकेट गुमाउदै एक सय ८४ रनको योगफल बनायो । 

इङ्ल्याडका लागि ज्याकब बेथेलले सर्वाधिक ५५ रनको योगदान दिए । त्यसैगरी कप्तान  ह्यारी ब्रुकले ५३, विल ज्याक्सले अविजित ३९ रनको योगदान दिँदा जस बटलरले २६ रन बनाए । 

बलिङतर्फ नेपालका दीपेन्द्र सिंह ऐरी, र नन्दन यादवले समान दुई–दुई विकेट लिए भने शेर मल्ल र सन्दीप लामिछानेले समान एक–एक विकेट झारे । 

नेपालले दुई पटकको च्याम्पियन इङ्ल्यान्डसँग खेल्दै यसपटकको विश्वकपको यात्रा सुरुवात गरेको हो । नेपालले यसअघि सन् २०१४ र सन् २०२४ को विश्वकपमा सहभागिता जनाएको थियो । दुवै पटकको विश्वकपमा नेपालले समूह चरण पार गर्न सकेको थिएन । 

नेपालको समूहमा इङ्ल्यान्डसँगै वेस्ट इण्डिज, इटाली र स्कटल्यान्ड छ ।