१२ असार २०८३, शुक्रबार
चीनले गोप्य रूपमा आणविक परीक्षण गरेको भन्ने अमेरिकी आरोपलाई अस्वीकार गरेको छ ।
चीनले यी आरोपलाई सरासर झूट भनेको छ । अमेरिकाले आफैँ नयाँ आणविक परीक्षण सुरु गर्ने योजना बनाएको पनि चीनको आरोप छ ।
समाचार एजेन्सी एएफपीसँग कुरा गर्दै चीनको विदेश मन्त्रालयले अमेरिकाको दाबी पूर्णतया आधारहीन भएको बताएको छ ।
शुक्रबार जेनेभामा भएको निशस्त्रीकरण सम्बन्धी संयुक्त राष्ट्रसंघीय सम्मेलनमा अमेरिकाले चीनले २०२० मा आणविक परीक्षण गरेको आरोप लगाएको थियो । चीनले अन्य धेरै आणविक परीक्षण पनि गरिसकेको र भविष्यमा थप गर्ने तयारी गरिरहेको अमेरिकाको आरोप छ ।
यी आरोप अमेरिका र रुसबीचको अन्तिम बाँकी रहेको आणविक हतियार नियन्त्रण सन्धिको म्याद एक दिन अघि मात्र सकिएको समयमा लगाइएका छन् ।
अमेरिकाले अब नयाँ आणविक हतियार नियन्त्रण सम्झौताको माग गरेको छ । उसले यसमा चीन पनि समावेश हुनुपर्ने बताएको छ ।
