आइसीसी टी–२० पुरुष विश्वकप क्रिकेटको दोस्रो खेलमा नेपालले आज (बिहीबार) इटालीसँग प्रतिस्पर्धा गर्दैछ । पहिलो खेलमा विश्वविजेता इंग्ल्यान्डलाई कडा टक्कर दिए पनि चार रनको झिनो अन्तरले पराजित नेपाल दोस्रो खेलमा जीत निकाल्ने लक्ष्यका साथ इटालीसँग भिड्न लागेको हो ।

नेपाल र इटालीको खेल भारतको मुम्बईस्थित वानखेडे स्टेडियममा दिउँसो सवा ३ बजे शुरू हुनेछ ।

पहिलो खेलमा इंग्ल्यान्डले दिएको १८५ रनको लक्ष्य पछ्याएको नेपाल चार रनले चुकेको थियो । नेपालले २० ओभरको समाप्तिमा ६ विकेटको क्षतिमा १८० रन मात्रै बनाउन सक्यो । तर, इंग्ल्यान्डसँगको खेलमा नेपालले गरेको साहसिक प्रदर्शनको विश्वभर चर्चा भैरहेको छ ।

इटाली भने तुलनात्मकरूपमा समूहको कमजोर टिम हो । २०२६ को क्रिकेट विश्वकपमा इटालीले पहिलोपटक डेब्यु गरेको हो । तीनपटक विश्वकप खेलिसकेको नेपालभन्दा इटाली नयाँ छ । यो विश्वकपमा नेपाल र इटाली दुवै टिमले पहिलो खेलमा हारको सामना गरेका छन् । नेपाल इंग्ल्यान्डसँग चार रनले पराजित हुँदा इटाली पहिलो खेलमा स्कटल्यान्डसँग ७३ रनको पराजय भोगेको थियो । दुवै टिमका लागि दोस्रो खेल जित्नैपर्ने दबाब छ ।

नेपाल र इटालीले हालसम्म कुनै पनि आधिकारिक टी– २० अन्तर्राष्ट्रिय प्रतियोगिता खेलेका छैनन् । नेपाल र इटालीबीच पहिलोपटक हुने खेल दुवै मुलुकका लागि नौलो हुनेछ ।

नेपालले सन् २०१४ मा बंगलादेशले आयोजना गरेको विश्वकपमा पहिलोपटक स्थान पक्का गरेको थियो । नेपालले दोस्रोपटक विश्वकप खेल्न १० वर्ष लगायो । सन् २०२४ को विश्वकपमा नेपालले दक्षिण अफ्रिका र बंगलादेशविरुद्ध उत्कृष्ट प्रदर्शन गरेको थियो । सन् २०१४ को विश्वकपकै सिलसिलामा नेपालले पहिलोपटक टेस्ट म्याच खेलिरहेको राष्ट्र अफगानिस्तानलाई हराएको थियो ।

अघिल्लो विश्वकपमा दक्षिण अफ्रिकासँग नेपाल एक रनले पराजित भएको थियो । यसअघि दुईपटक विश्वकप खेलेको नेपाल समूह चरणभन्दा माथि जान सकेको छैन । समूह सीमा नेपालसहित दुई पटकको विश्व विजेता वेस्ट इन्डिज, एक पटकको विजेता इंग्ल्यान्डसँगै स्कटल्यान्ड र इटाली छन् ।

नेपालले समूहको तेस्रो खेल फागुन ३ गते वेस्ट इन्डिज र फागुन ५ गते स्कटल्यान्डसँग खेल्ने छ ।