२६ जेठ २०८३, मंगलबार
न्युजिल्यान्डको ह्वाकाटानेस्थित अपानुई स्कूलमा विगत एक वर्षदेखि भइरहेको रहस्यमय चोरीको घटनामा अन्ततः एउटा बिरालो दोषी पाइएको छ। विद्यालय परिसरबाट जुत्ता, तौलिया, पौडी खेल्ने चश्मा र भित्री वस्त्रहरू लगातार हराउन थालेपछि सुरुमा सबैजना अलमलमा परेका थिए।
विशेष गरी विद्यालयको पौडी पोखरी प्रयोग हुने मौसममा यी सामानहरू बढी हराउने गरेका थिए।
चोरलाई पक्रन विद्यालयले सीसीटीभी क्यामेराको फुटेज हेर्दा एउटा कालो बिरालोले खेल मैदानमा ठूलो तौलिया तान्दै गरेको अचम्मको दृश्य देखियो। विद्यालयकी प्रधानाध्यापक माराम स्टुअर्टका अनुसार थप खोजी गर्दा खेलकुद सामग्री राख्ने ठाउँको पछाडि चोरिएका सामानहरूको ठूलो थुप्रो फेला परेको छ। उक्त बिरालोको मालिकले पनि आफ्नो घरपालुवा जनावर यस्ता सामान चोर्नमा निकै कुख्यात रहेको स्वीकार गरेका छन्।
विद्यालय प्रशासनले उक्त बिरालोलाई 'स्लिंकी मालिन्की' नाम दिएको छ। यस रोचक घटनालाई विद्यालयले विद्यार्थीहरूका लागि कथा लेख्ने एउटा रमाइलो विषय र आफ्ना सामानहरू झोलामा सुरक्षित राख्न सिकाउने पाठका रूपमा प्रयोग गर्ने भएको छ।
यो अनौठो 'बिरालो चोर' को चर्चा अहिले सामाजिक सञ्जालमा समेत भाइरल भइरहेको छ।
