प्रतिनिधिसभा सदस्य निर्वाचनका लागि प्रमुख राजनीतिक दलका पदाधिकारी र शीर्ष नेताहरूले लुम्बिनी प्रदेशका विभिन्न ठाउँबाट मतदान गर्दै छन् । भोलि (२१ फागुन) बिहीबार हुने निर्वाचनमा लुम्बिनी प्रदेशबाट प्रमुख पार्टीका नेतृत्वसहित शीर्ष नेताहरू उम्मेदवार समेत छन् । नेकपा एमालेका उपाध्यक्ष तथा रूपन्देही क्षेत्र नम्बर–२ का उम्मेदवार विष्णु पौडेलले रूपन्देहीको बुटवल उपमहानगरपालिका वडा नम्बर–८ स्थित सडक डिभिजन कार्यालयमा रहेको मतदान केन्द्रबाट मतदान गर्ने छन् ।

यस्तै अर्का उपाध्यक्ष तथा गुल्मी–२ का उम्मेदवार गोकर्ण विष्ट, गुल्मीको इस्मा गाउँपालिका–४ स्थित रामराज्य माविको केन्द्रबाट मतदान गर्नेछन् ।

यस्तै एमाले महासचिव तथा दाङ–२ बाट उम्मेदवार बनेका शंकर पोखरेलले दाङको तुलसीपुर उपमहानगरपालिका वडा नम्बर–१९ स्थित बिजौरी मतदान केन्द्रबाट मतदान गर्ने छन् ।

यस्तै राष्ट्रिय स्वतन्त्र पार्टी (रास्वपा) का महामन्त्री तथा रूपन्देही–१ का उम्मेदवार सुनील लम्सालले रूपन्देहीको तिलोत्तमा नगरपालिका–७ भलवारीस्थित प्रभात आधारभूत स्कूलको केन्द्रबाट मतदान गर्ने छन् ।

यस्तै नेपाली कांग्रेसका सह–महामन्त्री तथा दाङ–१ का उम्मेदवार योगेन्द्र चौधरीले गढवा गाउँपालिका वडा नम्बर–४ को खडगपुर केन्द्र मतदान केन्द्रबाट मतदान गर्ने छन् ।

नेकपाका प्रभावशाली नेता तथा रोल्पाबाट उम्मेदवार बनेका वर्षमान पुनले रोल्पा नगरपालिका वडा नम्बर–७ बालउदय प्राविको मतदान केन्द्रबाट मतदान गर्ने छन् ।

यस्तै एमाले सचिव छविलाल विश्वकर्माले वडा-११ लुम्बिनी बाणिज्य क्याम्पसको केन्द्रबाट मतदान गर्ने छन् । विश्वकर्मा यो पटक उम्मेदवार छैनन् ।

यस्तै रास्वपाका सहमहामन्त्री विपिनकुमार आचार्यले दाङको तुलसीपुर उपमहानगरपालिका वडा–१२ पशुपति माविको रहीपौरी केन्द्रबाट मतदान गर्ने छन् । आचार्य क्षेत्र नम्बर–२ को उम्मेदवार भए पनि उनको मतदाता नामावली क्षेत्र नम्बर ३ मा रहेकाले उनले त्यहीबाट मतदान गर्ने छन् ।

यस्तै एमाले प्रभावशाली नेता तथा गुल्मी–१ का उम्मेदवार प्रदीप ज्ञवालीले गुल्मीको रुरुक्षेत्र गाउँपालिका वडा नम्बर–४ को बम्घा निमावि चौतारा मतदान केन्द्रबाट मतदान गर्ने छन् ।

यस्तै कांग्रेसका अर्का प्रभावशाली नेता तथा गुल्मी–१ का उम्मेदवार चन्द्र भण्डारीले गुल्मीको छत्रकोट गाउँपालिका वडा नम्बर–१ हुँगास्थित जनजागृति माविबाट मतदान गर्ने छन् ।

नेपाली कम्युनिस्ट पार्टी (नेकपा) का संयोजक पुष्पकमल दाहाल 'प्रचण्ड' रुकुम पूर्वबाट उम्मेदवार बने पनि उनले आफैंले आफूलाई मतदान गर्न पाउने छैनन् । प्रचण्डको चितवनको भरतपुर महानगरपालिका वडा नम्बर १४ स्थित नेपाल प्रहरी स्कूल शान्तिपुर मतदान केन्द्रबाट मतदान गर्ने छन् ।

लुम्बिनी प्रदेशबाट उम्मेदवार बनेका शीर्ष नेताहरू मध्ये प्रचण्ड, विपिन आचार्यले आफैंले आफैंलाई मतदान गर्न पाउने छैनन् ।

लुम्बिनी प्रदेशका १२ जिल्लामा २६ निर्वाचन क्षेत्र रहेका छन् ।

लुम्बिनी प्रदेशमा झण्डै ३४ लाख मतदाता कायम भएका छन् । १७ लाख १५ हजार १६३ जना पुरुष, १६ लाख ७१ हजार ४७९ जना महिला र अन्य मतदाता ३८ जना गरी कुल ३३ लाख ८६ हजार ६८० जना रहेका छन् ।

लुम्बिनी प्रदेश निर्वाचन कार्यालय, निर्वाचन आयोगको तथ्याङ्कअनुसार बागमती र कोशी प्रदेशपछि मतदाता संख्याका आधारमा लुम्बिनी प्रदेश तेस्रो स्थानमा रहेको छ ।

प्रदेश निर्वाचन कार्यालयका सूचना अधिकारी गेहेन्द्र कुँवरका अनुसार लुम्बिनी प्रदेशका १२ जिल्लाका २६ वटा निर्वाचन क्षेत्रमा झण्डै ६ सय उम्मेदवार चुनावी मैदानमा छन् । जसमा ३९४ जना उम्मेदवार राजनीतिक दलका र २०५ जना स्वतन्त्र रहेका छन् ।

कुल उम्मेदवारमध्ये ५४३ जना पुरुष र ५६ जना महिला उम्मेदवार छन् । लुम्बिनी प्रदेशमा कुल १ हजार ६७१ वटा मतदानस्थल र ३ हजार ९९८ वटा मतदान केन्द्र तोकिएको छ ।

तराईका जिल्लाहरू रूपन्देही, कपिलवस्तु, बाँके, दाङ मतदाता संख्यामा अगाडि छन् भने पहाडी जिल्लामा मतदाता संख्या केही कम छ ।