नेकपा एमालेको ‘गढ’ मानिँदै आएको रूपन्देही क्षेत्र नम्बर २ बाट यसपटक राष्ट्रिय स्वतन्त्र पार्टी (रास्वपा)का सुलभ खरेल प्रतिनिधिसभा सदस्यमा विजयी भएका छन् । 

प्रत्यक्षतर्फको मतगणनाको अन्तिम नतिजाअनुसार उनले राजनीतिक अनुभवी उम्मेदवार एमालेका उपाध्यक्ष तथा पूर्वअर्थमन्त्री विष्णु पौडेललाई भारी मतान्तरले पारिजात गरेका हुन् ।

शनिबार बिहान आएको अन्तिम मत परिणामअनुसार खरेलले ५६ हजार ५५० मत ल्याएर विजयी हुँदा पौडेलले १२ हजार ८६१ मत मात्र प्राप्त गरे । फागुन २१ गते भएको निर्वाचनमा यहाँ ८६ हजार मत खसेको थियो ।  

यस क्षेत्रमा २०६४ सालमा भएको संविधानसभा निर्वाचनयता उपाध्यक्ष पौडेलले लगातार चार पटक जित्दै आएको क्षेत्र हो । पौडेल २०५६ देखि यहीँ क्षेत्रबाट पार्टी र संसदीय राजनीतिमा सक्रिय थिए ।​

खरेलको उदयले युवा पुस्ताले उनीप्रति ठूलो आशा राखेका छन् ।

२०५४ मा जन्मिएका खरेल बुटवल उपमहानगरपालिका–१६ रूपन्देहीका स्थायी बासिन्दा हुन् । जित सुनिश्चित रहेको बताउँदै आए पनि यति ठूलो अभूतपूर्व मत आउने उनले सोचेका थिएनन् ।

काठमाडौं महानगरपालिकाका तत्कालीन मेयर बालेन्द्र शाह रास्वपा प्रवेश, भावी प्रधानमन्त्रीको उम्मेदवार घोषणापछि यस क्षेत्रमा रास्वपाप्रतिको आकर्षण बढेको थियो ।

बालेन शाह ‘रोड सो’ गर्दै बुटवल आइपुग्दा यहाँको भीडले देशभर चर्चा पाएको थियो । नेकपा एमाले निकट अनेरास्ववियुमा आबद्ध खरेलले नेपाल ल क्याम्पसबाट पाँच वर्षे बीए–एलएलबी सकेपछि चार वर्ष वकालत गरेका थिए ।

तत्कालीन प्रधानमन्त्री केपी शर्मा ओलीले गरेको प्रतिनिधिसभा विघटनविरुद्ध रिट दायर गरेपछि खरेल चर्चामा आएका थिए । त्यतिबेला उनी सबैभन्दा कान्छो रिट निवेदक भनेर चिनिएका थिए ।

निर्वाचन आयोगले राष्ट्रिय स्वतन्त्र पार्टीका एक दर्जनभन्दा बढी संघीय सांसदलाई जरिवाना तिराउने निर्णय गर्दा खरेलले त्यसविरुद्ध पनि रिट निवेदन दिएका थिए ।

त्यसपछि संवैधानिक कानूनमा एकवर्षे स्नातकोत्तर गर्न उनी अमेरिका पुगेका थिए । त्यहाँ केही वर्ष पढेर नेपाल फर्किएपछि राष्ट्रिय स्वतन्त्र पार्टीमा आबद्ध भएका थिए ।

रास्वपा सभापति रवि लामिछानेमाथि लागेको सहकारी ठगी, संगठित अपराध र सम्पत्ति शुद्धीकरणको मुद्दा जस्ता विषयमा उनले कानूनी परामर्श दिएका थिए ।