लुम्बिनी प्रदेशसभा सदस्य पदबाट राजीनामा दिएर प्रतिनिधिसभाको चुनाव लडेका चार जनामध्ये तीन जना पराजित भएका छन् । 

आफ्नो कार्यकाल साढे दुई वर्ष बाँकी रहँदै राजीनामा दिएर संघीय संसद्‌मा उक्लिने लक्ष्यसहित उनीहरू चुनावी मैदानमा उत्रिएका थिए । तीमध्ये एकजना मात्र निर्वाचित भएका हुन् । 

केहीको जमानत समेत जफत भएको छ । २०७९ को प्रदेशसभा निर्वाचनमा रुपन्देही–४ (क)बाट निर्वाचित कन्हैया बनिया, दाङ–३ (ख)बाट निर्वाचित धनबहादुर मास्की, बाँके–१ (क)बाट निर्वाचित कृष्णा केसी र बर्दिया–२ (ख)बाट निर्वाचित धर्मबहादुर चौधरी प्रदेशबाट राजीनामा दिएर फागुन २१ को प्रतिनिधिसभा निर्वाचनमा होमिएका थिए । 

जसमध्ये बनिया रुपन्देही–४ बाट निर्वाचित भएका छन् । बनिया जनता समाजवादी पार्टी (जसपा)बाट राजीनामा दिएर राष्ट्रिय स्वतन्त्र पार्टी (रास्वपा)बाट उम्मेदवारी दिएका थिए । 

उनी २८ हजार ६६ मत ल्याएर विजयी भएका हुन् । उनका निकटतम् प्रतिस्पर्धी एमालेका प्रमोद यादवले २० हजार २६२ मत ल्याए । उनी २०७९ मा तत्कालीन लोकतान्त्रिक समाजवादी पार्टी (लोसपा)बाट प्रदेशसभामा निर्वाचित भएका थिए ।

तत्कालीन नेकपा माओवादी केन्द्रबाबाट प्रदेशमा निर्वाचित मास्की यो निर्वाचनमा दाङ–३ बाट पराजित भएका छन् । उनले ९ हजार ३२८ मत मात्र ल्याउनका उनका प्रतिस्पर्धी रास्वपाका कमल सुवेदी ४४ हजार २४८ मत ल्याएर विजयी भए । 

मास्की चौथो स्थानमा मात्र रहन सके । तत्कालीन माओवादीबाट प्रदेशसभा रहेकी कृष्णा केसी प्रगतिशील लोकतान्त्रिक पार्टी (प्रलोपा) बाट बाँके–१ की उम्मेदवार बनेकी थिइन् । उनले १ हजार २४० मत मात्र ल्याइन् । 

यो क्षेत्रमा रास्वपाका सुरेश कुमार चौधरीले ३२ हजार ७९२ मत ल्याएर विजयी भएका छन् । केसी प्रतिस्पर्धामै आइनन् ।

बर्दिया–२ बाट उज्यालो नेपाल पार्टी (उनेपा)मा प्रवेश गरी उम्मेदवार बनेका पूर्वमन्त्री समेत रहेका धर्मबहादुर चौधरीले ४ हजार ४७१ मत मात्र ल्याउन सके । यो क्षेत्रमा पनि रास्वपाका श्रीधर पोखरेलले २९ हजार ६७८ मत ल्याएर विजयी भएका थिए । चौधरी पनि प्रतिस्पर्धा आउन सकेनन् ।

विशेषगरी यसपटक देखिएको नयाँ राजनीतिक शक्तिको लहरले धेरै अनुभवी नेताले समेत अप्रत्याशित परिणाम भोग्नुपरेको छ ।

प्रदेशस्तरमा लोकप्रिय देखिएका नेताहरू संघीय निर्वाचनमा मतदाताको विश्वास जित्न नसक्नुले मतदाताको प्राथमिकता अपेक्षा र राजनीतिक सोच बदलिँदै गएको संकेत गर्छ । 

यसले नेपाली राजनीतिमा आगामी दिनमा अझ ठूलो पुर्नसंरचचना र नयाँ शक्ति सन्तुलनको संकेत समेत गरेको विश्लेषण हुन थालेको छ ।