२४ जेठ २०८३, आइतबार
काठमाडौंको लाजिम्पाटमा सञ्चालित श्रीद्धि इन्टरनेशनल अस्पतालले फेक रेक्यूका नाममा ल्याइएका विदेशी पदयात्रीमाथि गर्दै आएको ज्यादतीको पर्दाफास भएको छ ।
यो अस्पतालले फेक रेस्क्यूमार्फत् भर्ना हुन आएका बिरामीको ‘हेल्थ रिपोर्ट कार्ड’मा चिकित्सकको कीर्ते हस्ताक्षर र अनधिकृत छाप प्रयोग गरेको भेटिएको छ ।
प्रहरीको केन्द्रीय अनुसन्धान ब्यूरो (सीआईबी)ले अनुसन्धान गर्दा सो अस्पतालमा भर्ना भएका बिरामीको नक्कली स्वास्थ्य रिपोर्ट बनाई एक डाक्टरको नाममा ६ सय २७ र अर्को डाक्टरको नाममा एक सय २७ भन्दा बढी हस्ताक्षर प्रयोग भएको देखिएको हो ।
सीआईबीले अस्पतालका अध्यक्ष डा. गिर्वाणराज तिमिल्सिनालाई पक्राउ गरेको छ ।
अचम्मको कुरा त अस्पतालको वेबसाइटमा अस्पतालसँग कुनै सरोकार नै नभएका चिकित्सकहरूको नाम राखेर आफ्नो ‘ब्रान्डिङ’ गरेको तथ्य खुलेको छ ।
सीआईबीले अनुसन्धान गर्दा पर्यटकहरूलाई बिरामी भनी अस्पतालमा भर्ना गरेको देखाए पनि उनीहरू भने होटल तथा अन्यत्र घुम्न जाने गरेको पाइएको छ ।
सीआईबीका प्रमुख एवं प्रहरी अतिरिक्त महानिरीक्षक (एआईजी) मनोज केसीका अनुसार अस्पतालको कागजात नियन्त्रणमा लिएर अनुसन्धान भइरहेको छ ।
‘अस्पतालमा नभएका बेड नम्बरहरू क्रमशः १०१ देखि १०६, १०९ देखि ११२ र २०१ देखि २०६ मा भर्ना भएको देखाई उनीहरूलाई होटल वा अन्यत्र जाने सुविधा दिइएको पाइयो,’ सीआईबीका एक अनुसन्धान अधिकृतले लोकान्तरसँग भने, ‘अस्पतालमा भने १०७, १०८, २०७ देखि २१२ र ३०१ देखि ३०३ नम्बरका बेड मात्रै बिरामीका लागि प्रयोग भएको देखियो ।’
बिरामीमाथि अनावश्यक दबाब
यो अस्पतालले भर्ना हुन आएका पर्यटकहरूलाई अनावश्यक दबाब दिँदै आएको पाइएको छ ।
हेलिकप्टरबाट आएका पर्यटक बिरामीले भर्ना हुन इन्कार गर्दा पनि नगद भुक्तानीका लागि जबर्जस्ती दबाब दिने गरेको सीआईबीले जनाएको छ ।
अस्पतालले बिरामीलाई कार्ड पेमेन्ट गर्न भन्दै पीओएस मशिन समेत राखेको पाइएको छ ।
स्रोतले भन्यो, ‘कार्ड वा नगदमार्फत् भुक्तानी दिन दबाब दिन अस्पतालले पर्यटकको राहदानी समेत होल्ड गर्ने जस्ता गैरकानूनी काम गर्दै आएको देखियो ।’
अचम्मको कुरा त श्रीद्धिले एकै उडानमा आएका वा एकै परिवारका सदस्यलाई फरक–फरक मितिमा भर्ना भएको देखाई बीमा दाबी गर्दै आएको अनुसन्धानबाट खुलेको छ ।
अस्पतालमा भर्ना भएको कागजात बनाइएका पर्यटकहरू काठमाडौंका लक्जरी होटलमा बसेको विवरण समेत सीआईबीले फेला पारेको छ ।
सीआईबीका अनुसन्धान अधिकृत भन्छन्, ‘बिरामीलाई बीमा कम्पनीले कुरा गर्न वा लोकल एजेन्टले भेट्न खोज्दा बिरामी सुतिरहेको वा ल्याब टेष्टमा गएको बहाना बनाएर पर्यटकलाई भेट्न नदिएको पाइयो ।’
रेस्क्यू कम्पनीलाई कमिसन !
अस्पतालले बीमा दाबीबाट प्राप्त रकममध्ये १० प्रतिशत रेस्क्यू कम्पनीलाई र ३० प्रतिशत ट्रेकिङ कम्पनीलाई अवैध कमिसन दिने गरेको सीआईबीको अनुसन्धानबाट खुलेको छ ।
स्रोतले भन्यो, ‘रेस्क्यू कम्पनीले अस्पतालमा बिरामी लगिदिएबापत उसलाई बीमा बापतको १० प्रतिशत र ट्रेकिङ कम्पनीलाई ३० प्रतिशतसम्म दिने गरेको देखियो ।’
अस्पतालले बिरामी भनेर राखिएका पर्यटकलाई बियर समेत उपलब्ध गराउँदै आएको पाइएको छ । प्रहरीका अनुसार अस्पतालको हाताभित्र ‘वार्म अफ कर्नर क्याफे एन्ड बार’ सञ्चालन गरी मदिरा बिक्री गर्दै आएको देखियो । त्यहाँ भर्ना भएका बिरामी भनिएका पर्यटकले समेत बियर पिउँदै आएका थिए ।
चार वर्षमा ९ करोड २४ लाख बढी अमेरिकी डलर बीमा दाबी
सीआईबीले अनुसन्धान गर्दा श्रीद्धिले सन् २०२२ देखि २०२५ सम्मको अवधिमा ७ सय ४९ जनाभन्दा बढी पर्यटकको उपचार गरेको देखिन्छ ।
यस अवधिमा नगद र कार्ड पेमेन्टबाहेक बैकिङ कारोबारमार्फत् ९ करोड २४ लाख ४८ हजार ९०५ बराबरको अमेरिकी डलर बीमा दाबी गरी प्राप्त गरेको देखिन्छ ।
‘बिरामीले भर्ना हुन्न भन्दा पनि जबर्जस्ती भर्ना गराई नक्कली रिपोर्ट कार्ड बनाएर बीमा रकम दाबी गरेको देखिन्छ,’ सीआईबीले भन्यो, ‘अस्पतालको बैंकिङ कारोबार हेर्दा हामी छक्क पर्यौं ।’
