श्रम, रोजगार तथा सामाजिक सुरक्षा मन्त्रालयले २९ औद्योगिक तथा व्यावसायिक प्रतिष्ठानमा अनुगमन गरेको छ ।

मन्त्रालयअन्तर्गत श्रम तथा व्यवसायजन्य सुरक्षा विभाग, व्यवसायजन्य सुरक्षा तथा स्वास्थ्य केन्द्र र श्रम तथा रोजगार कार्यालयमार्फत अनुगमन गरिएको हो । मातहत कार्यालयबाट २२ र विभागबाट गठन भएका तीन टोलीले सात प्रतिष्ठानमा अनुगमन गरेका थिए । विभागले सरकारी तथा निजी अस्पताललाई प्राथमिकतामा राखेको जनाएको छ ।

अनुगमनका क्रममा श्रम ऐन, नियमावली तथा प्रचलित कानूनको पालना भए नभएको जाँच गरिएको थियो । विशेषगरी न्यूनतम पारिश्रमिक कार्यान्वयन, व्यवसायिक सुरक्षा तथा स्वास्थ्य, बाल श्रमको अवस्था, सामाजिक सुरक्षा कोषमा आवद्धता र नियमित श्रम अडिटको अवस्थाबारे निरीक्षण गरिएको मन्त्रालयले जनाएको छ ।

अनुगमनका क्रममा केही प्रतिष्ठानमा न्यूनतम पारिश्रमिक लागू नभएको, श्रम अडिट नगरिएको र सामाजिक सुरक्षा कोषमा सूचीकरण नभएको पाइएपछि ती प्रतिष्ठानलाई तत्काल सुधार गर्न निर्देशन दिइएको छ ।