०८ साउन २०८३, शुक्रबार
चीनको सान्यामा जारी छैटौँ एसियन बीच गेम्सको महिला कबड्डीमा नेपालसँगै बंगलादेश पनि सेमिफाइनलमा पुगेको छ ।
बंगलादेशले शनिबार खेलिएको खेलमा चाइनिज ताइपेईलाई ५९–२० अंकले हराउँदै सेमिफाइनलमा स्थान पक्का गरेको हो ।
त्यसअघि, शनिबार नै खेलिएको खेलमा नेपाली टोलीले थाइल्यान्डलाई ४९–३३ ले हराउँदै सेमिफाइनलमा स्थान बनाएको थियो ।
समूह ‘बी’ तालिकामा चार अंकसहित नेपाल पहिलो र समान अंक बटुलेको बङ्गलादेश दोस्रो स्थानमा छन् । थाइल्यान्ड र चाइनिज ताइपेई भने समूहगत चरणबाटै बाहिरिएका छन् ।
नेपाल र बंगलादेश एक खेलअगावै सेमिफाइनलमा पुगेका हुन् । नेपाल र बंगलादेशबीच आइतबार खेल हुँदैछ । त्यो खेलपछि समूह विजेताको टुङ्गो लाग्नेछ ।
उक्त खेलमा विजयी हुने टोली समूह विजेताका रूपमा र पराजित हुने टोली उप–विजेताका रूपमा सेमिफाइनलमा पुग्नेछन् ।
समूह ‘ए’ बाट भने भारत पहिलो र श्रीलंका दोस्रो हुँदै सेमिफाइनलमा पुगेका छन् । समूह विजेता बनेमा नेपालले सेमिफाइनलमा श्रीलंकाको सामना गर्नेछ ।
समूह उप–विजेता बने नेपालले भारतसँग सेमिफाइनल खेल्नेछ । सेमिफाइनलमा पुग्ने चारवटै टोलीको कम्तीमा कास्य पदक पनि पक्का भइसकेको छ ।
