सशस्त्र प्रहरी बल नेपालको १३ औँ महानिरीक्षकमा नारायणदत्त पौडेलको बढुवा भएको छ । सोमबार सिंहदरबारमा बसेको मन्त्रिपरिषद्को बैठकले एआईजी पौडेललाई महानिरीक्षकमा बढुवा गर्ने निर्णय गरेको हो ।

वर्तमान महानिरीक्षक राजु अर्याल यही वैशाख १८ गते अनिवार्य अवकाशमा जाने भएपछि सरकारले एआईजी पौडेललाई आइजीपी बनाउने निर्णय गरेको हो ।

तीन दशकभन्दा लामो सुरक्षा सेवाको अनुभव बोकेका सुरक्षा अधिकारीका रूपमा पौडेल परिचित छन् । नेपाल प्रहरीबाट करियर शुरू गरेका पौडेल २०५८ वैशाख ४ गते सशस्त्र प्रहरी बलमा स्थानान्तरण भएका थिए ।

सुर्खेतको साविक जर्बुटा गाविस–५ मा जन्मिएका पौडेल संगठनमा सरल र मिजासिला मानिन्छन् ।

स्नातकोत्तर तहसम्म अध्ययन गरेका पौडेलले नेपाल प्रहरीमा रहँदा रोल्पामा स्ट्राइकिङ टोली कमान्डरका रूपमा कार्य गर्दै चुनौतीपूर्ण सुरक्षा अवस्थामा प्रभावकारी नेतृत्व प्रदर्शन गरेका थिए ।

उक्त कार्यका लागि उनलाई प्रहरी प्रधान कार्यालयले ग्रेड थप गरी पुरस्कृत गरेको थियो ।

त्यसबाहेक इलाका प्रहरी कार्यालय बिर्तामोडको प्रमुख, जिल्ला प्रहरी कार्यालय दाङमा प्रहरी निरीक्षक तथा प्रहरी प्रशिक्षण प्रतिष्ठानमा प्रशिक्षकका रूपमा पनि उनले जिम्मेवारी निर्वाह गरेका थिए ।

सशस्त्र प्रहरी बलमा स्थानान्तरणपछि उनले विभिन्न महत्त्वपूर्ण जिम्मेवारी सम्हाले । दाङको तुल्सीपुरस्थित सुरक्षा बेस प्रमुखदेखि राष्ट्रिय सुरक्षा परिषद् सचिवालयमा समन्वयकारी भूमिका, शान्ति प्रक्रियाका क्रममा विशेष संयन्त्रमा संलग्नता, सीमा सुरक्षा कार्यालय बर्दिया तथा विशेष कार्यदल गणहरूको नेतृत्वजस्ता जिम्मेवारी उनले सम्हालेका थिए ।

सशस्त्र प्रहरीको प्रधान कार्यालयका विभिन्न विभाग, क्षेत्रीय मुख्यालयहरू तथा उपत्यका सुरक्षा कार्यालयमा उनले नीतिगत र रणनीतिक योजना निर्माणमा महत्त्वपूर्ण योगदान दिएका छन् । एआईजी हुँदा उनीसँग मानव स्रोत, सीमा सुरक्षा र कार्य विभागमा नेतृत्व सम्हालेको अनुभव छ । 

पौडेल २०५८ सालमा सशस्त्र प्रहरी नायव उपरीक्षकमा बढुवा भएका थिए । त्यसपछि २०६३ मा उपरीक्षक, २०७० मा वरिष्ठ उपरीक्षक, २०७५ मा नायब महानिरीक्षक र २०७९ मा अतिरिक्त महानिरीक्षक पदमा बढुवा भएका हुन् ।

उत्कृष्ट सेवाका लागि उनले सुप्रबल जनसेवाश्री, प्रबल जनसेवाश्री (चौथो), गोरखा दक्षिण बाहु (चौथो), प्रदेश सेवा पदकलगायत सम्मान प्राप्त गरेका छन् ।

साथै, संयुक्त राष्ट्रसंघीय शान्ति मिसनअन्तर्गत लाइबेरिया र कोसोभोमा सेवा गरेबापत यूएन पदकसमेत प्राप्त गरेका छन् ।

पौडेलले सुरक्षा, आतंकवाद नियन्त्रण, नेतृत्व विकास तथा अन्तर्राष्ट्रिय सहकार्यसम्बन्धी विभिन्न तालिम तथा सेमिनारमा श्रीलंका, इटाली, अमेरिका, चीन र डेनमार्कलगायत देशमा सहभागिता जनाएका छन् ।

नेपालभित्र पनि उनले अनुसन्धान, युद्धकला, व्यवस्थापन तथा अपरेशनसम्बन्धी विविध तालिम लिएका छन् ।

संयुक्त राष्ट्रसंघीय शान्ति स्थापना मिसनअन्तर्गत उनले लाइबेरियामा ६ महिना र कोसोभोमा करिब २५ महिना सेवा प्रदान गरेका छन् ।

लामो अनुभव, विविध जिम्मेवारी र अन्तर्राष्ट्रिय सहभागितासहित पौडेलले सशस्त्र प्रहरी बल नेपाललाई व्यावसायिक र सक्षम संगठनका रूपमा अगाडि बढाउन महत्त्वपूर्ण भूमिका निर्वाह गरिरहेका छन् ।

सीमा सुरक्षा, आन्तरिक शान्ति र संगठनात्मक सुदृढीकरणमा उनको योगदान उल्लेखनीय मानिन्छ ।

यस्तो छ दर्जागत जिम्मेवारी:

– सशस्त्र प्रहरी नायव उपरीक्षक रहँदा सुरक्षा बेस तुलसीपुर दाङमा प्रमुख रही शान्ति सुव्यवस्था कायम गर्न महत्त्वपूर्ण भूमिका निर्वाह ।

– सशस्त्र प्रहरी नायव उपरीक्षक दर्जामा राष्ट्रिय सुरक्षा परिषद्को सचिवालय सिंहदरबारमा रही उच्च स्तरको समन्वयकारी भूमिका ।

– सशस्त्र प्रहरी नायव उपरीक्षक दर्जामा २०६३/६४ शान्ति प्रक्रियाको बेला अनमिन मातहत रहने गरी हतियार निगरानीको सदस्यको रूपमा रही कार्य सम्पादन ।

– सशस्त्र प्रहरी उपरीक्षक दर्जामा सीमा सुरक्षा कार्यालय बर्दिया, नीलबराही गण र बगलामुखी विशेष कार्यदल गणको गणपति ।

– सशस्त्र प्रहरी उपरीक्षक रहँदा पूर्व क्षेत्रीय सशस्त्र प्रहरी बल मुख्यालय बराह बाहिनी पाँखली, सशस्त्र प्रहरी बल प्रधान कार्यालय कार्य विभाग र उपत्यका सशस्त्र प्रहरी बल मुख्यालय पशुपतिनाथ बाहिनी (इन्ट)मा रही फिल्ड ड्युटी तथा स्टाफिङ ड्युटीमा उत्कृष्ट कार्य सम्पादन ।

– सशस्त्र प्रहरी वरिष्ठ उपरीक्षक दर्जामा प्रधान कार्यालयमा प्रशासन विभाग, व्यावसायिकता तथा गुणस्तर निर्धारण निर्देशनालय, उपत्यका सुरक्षा कार्यालय (इन्ट)मा रही नीतिगत तथा रणनैतिक योजनाहरू निर्माणमा महत्त्वपूर्ण भूमिका ।

– सशस्त्र प्रहरी वरिष्ठ उपरीक्षकमा सशस्त्र प्रहरी बल प्रधान कार्यालय आर्थिक प्रशासन महाशाखा प्रमुख तथा यूएन शान्ति स्थापनार्थ तालिम शिक्षालय, काकनीका समादेशकको रूपमा सफल नेतृत्व प्रदान ।

– सशस्त्र प्रहरी वरिष्ठ उपरीक्षकमा पूर्व क्षेत्रीय सशस्त्र प्रहरी बल मुख्यालय बराह बाहिनी पाँखली र सुदूर पश्चिम क्षेत्रीय सशस्त्र प्रहरी बल मुख्यालय बैद्यनाथ बाहिनीमा सहायक बाहिनीपतिका रूपमा उत्कृष्ट समन्वय र सहकार्य गरी उच्च व्यावसायिकता प्रदर्शन ।

– सशस्त्र प्रहरी नायब महानिरीक्षक रहँदा सशस्त्र प्रहरी बल नेपाल प्रधान कार्यालय कार्य तथा सीमा सुरक्षा विभाग तथा मानव स्रोत विभागमा रही नीतिगत तथा रणनीतिक योजनाहरू निर्माणमा विशेष भूमिका ।

– सशस्त्र प्रहरी नायब महानिरीक्षक रहँदा बाहिनीपतिको रूपमा लुम्बिनी तथा गण्डकी प्रदेशस्थित बाहिनी मुख्यालयहरूमा सफल नेतृत्व प्रदान ।

– सशस्त्र प्रहरी अतिरिक्त महानिरीक्षक हुँदा मानव स्रोत, सीमा तथा कार्य विभागका विभागीय प्रमुखको रूपमा रणनीतिक तथा नीतिगत निर्माण र कार्यान्वयन ।

कहिले कुन पदमा बढुवा

२०५८/३/१८ – सशस्त्र प्रहरी नायव उपरीक्षक (कामु)

२०५८/१२/१८ – सशस्त्र प्रहरी नायव उपरीक्षकमा स्थायी बढुवा

२०६३/१२/२९ – सशस्त्र प्रहरी उपरीक्षकमा बढुवा

२०७०/०२/०२ – सशस्त्र प्रहरी वरिष्ठ उपरीक्षकमा बढुवा

२०७५/०७/१३ – सशस्त्र प्रहरी नायब महानिरीक्षकमा बढुवा

२०७९/०२/०६ – सशस्त्र प्रहरी अतिरिक्त महानिरीक्षक बढुवा

२०८३/०१/१४ – महानिरीक्षकमा बढुवा