अख्तियार दुरुपयोग अनुसन्धान आयोगले सरकारी साक्षीका रूपमा प्रस्तुत भएकी दुर्गा भण्डारी (थापा)ले अदालतमा झुटो बकपत्र गरेको भन्दै उनीविरुद्ध पनि भ्रष्टाचार मुद्दा दायर गरेको छ ।

आयोगका अनुसार विशेष अदालतमा विचाराधीन रहेको रामा शंकर प्रसाद कुशवाहासमेत प्रतिवादी रहेको भ्रष्टाचार मुद्दामा सरकारी साक्षीका रूपमा प्रस्तुत भएकी रौतहटको चन्द्रपुर नगरपालिका–८ निवासी भण्डारीले आयोगसमक्ष दिएको बयान र आरोप मागदाबी विपरीत हुने गरी अदालतमा बकपत्र गरेकी हुन् ।

अनुसन्धानका क्रममा उनले अनुसन्धान अधिकृतलाई सहयोग गरेकाले यसअघि भ्रष्टाचार निवारण ऐन, २०५९ को दफा ५५ अनुसार सजायमा छुट दिई प्रतिवादी नबनाई सरकारी साक्षीका रूपमा राखिएको थियो । 

तर यही वैशाख २ गते विशेष अदालत काठमाडौंमा बकपत्र गर्दा उनले अघिल्लो बयानविपरीत तथ्य प्रस्तुत गरेको पुष्टि भएको आयोगले जनाएको छ ।

अनुसन्धानबाट सर्लाहीको बलरा नगरपालिका अन्तर्गत सञ्चालन भएको ‘किशोरीहरूका लागि खेलौना बनाउने तालिम’ कार्यक्रममा अनियमितता भएको खुलेको आयोगका प्रवक्ता सुरेश न्यौपानेले जनाएका छन् । 

उक्त तालिममा मुख्य प्रशिक्षकका रूपमा रहेकी भण्डारीले ३० दिनको तालिममध्ये केवल ५ दिन मात्र प्रशिक्षण दिए पनि पूरै ३० दिन सञ्चालन भएको देखिने गरी झुट्टा कागजात तयार पार्न सहयोग गरेको आरोप छ ।

यसरी उनले आफूसमेतलाई गैरकानूनी लाभ दिलाउने तथा सार्वजनिक संस्थालाई नोक्सानी पुर्‍याउने बदनियतले काम गरेको पुष्टि भएको आयोगले जनाएको छ । 

उक्त कसुर भ्रष्टाचार निवारण ऐन, २०५९ को दफा ८(१)(ङ) तथा दफा २२ अनुसारको अपराध भएको ठहर गरिएको छ ।

प्रकरणमा मुख्य कसुरदारतर्फ ३ लाख ८२ हजार ५३ रूपैयाँ बिगो कायम गरिएको छ । सोही आधारमा भण्डारीलाई पनि मुख्य कसुरदारसरह सजाय हुनुपर्ने मागसहित आयोगले बिहीबार विशेष अदालत, काठमाडौंमा आरोपपत्र दायर गरेको प्रवक्ता न्यौपानेले बताए ।