१० साउन २०८३, आइतबार
गत भदौ २४ गतेको जेनजी आन्दोलनका क्रममा कास्की कारागारबाट भागेका एक व्यक्तिले नवलपरासीमा वृद्ध दम्पतीमाथि आक्रमण गरेको खुलेको छ ।
देवचुली नगरपालिका-१६ बस्ने ७५ वर्षीय जीवनराम थनेत र उनकी श्रीमती ७१ वर्षीया गुलवसनिया थनेतलाई आक्रमण गरेको आरोपमा बागलुङको गलकोट नगरपालिका-९, बासकोट घर भई हाल काठमाडौंको सुकेधारा बस्ने ३१ वर्षीय सञ्जय विकलाई प्रहरीले पक्राउ गरेको हो ।
उनले गत चैत २३ गते थनेत दम्पतीमाथि आक्रमण गरेका थिए । त्यसक्रममा उनले लवसनिया थनेतले घाँटी र कानमा लगाएको सुनका गरगहना समेत लुटि भागेका थिए । उपचारका क्रममा जीवनरामको पुरानो मेडिकल कलेज चितवनमा मृत्यु भएको थियो भने गुलवसनियाको उपचार भइरहेको छ ।
घटनापछि फरार रहेका विकलाई प्रहरीको केन्द्रीय अनुसन्धान ब्यूरो (सीआईबी)को टोलीले यही वैशाख १६ गते बुधबार सुकेधाराबाट पक्राउ गरेको हो । उनीमाथि काठमाडौं जिल्ला अदालतबाट ७ दिनको म्याद थप लिएर अनुसन्धान भइरहेको सीआईबीले जनाएको छ ।
पक्राउ परेका विकको साथबाट ३ लाख ७५ हजार नगर, मोबाइल ३ वटा, नेपाल टेलिकम र एनसेलको ४/४ वटा सिम बरामद भएको सीआईबीले जनाएको छ ।
उनी यसअघि पनि हत्या, लुटपाट र चोरी घटनामा संलग्न रहेको प्रहरी अनुसन्धानबाट खुलेको छ । उनीविरुद्ध २०७२ असारमा जिल्ला प्रहरी कार्यालय, कास्कीमा चोरी मुद्दा दर्ता भएको पाइएको छ ।
यसैगरी, २०८० मंसिर ५ गते एक महिलाको हत्या गरी लुटपाट गरेको घटनामा वडा प्रहरी कार्यालय बैदाम, कास्कीमा ज्यान सम्बन्धी कसुर र डाँका मुद्दामा अनुसन्धानपश्चात मिति २०८१ साउन २९ गते देखि पुर्पक्षका लागि कास्की कारागारमा थुनामा रहेका थिए ।
तर गत भदौ २४ गतेको जेनजी आन्दोलनको मौकामा उनी कास्की कारागारबाट भागेर फरार भएका थिए ।
