२२ असार २०८३, सोमबार
आईसीसी विश्वकप लीग टु सिरिजअघिको अभ्यास खेलमा नेपालको वैकल्पिक टीम (नेपाल ए)ले स्कटल्यान्डलाई पराजित गरेको छ ।
मूलपानी क्रिकेट ग्राउन्डमा बिहीबार सम्पन्न खेलमा नेपाल ए ४५ रनले विजयी भयो । २७८ रनको लक्ष्य पछ्याएको स्कटल्यान्ड १० बल अगावै २३२ रनमा अलआउट भयो ।
स्कटल्यान्डका लागि फिनाली म्याकक्रेथले सर्वाधिक ५२, ज्याक जार्भिसले ४५ र मार्क वाटले ३७ रनको योगदान गरे ।
नेपालका रसिद खानले ३, साहब आलम, युवराज खत्री र बसिर अहमदले २/२ तथा कुशल मल्लले १ विकेट लिए ।
यसअघि टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर २७७ रन जोडेको थियो ।
नेपालका लागि देव खनालले सर्वाधिक ६३, मयान यादवले ४५, सन्दीप जोराले ३४, पवन शर्राफले ३१ र दीपक डुम्रेले २३ रन बनाएका थिए ।
स्कटल्यान्डको टीम नेपाल र अमेरिकासँग ली टु सिरिज खेल्न काठमाडौं आएको हो । लिग टुका खेल आगामी साता किर्तिपुरमा हुनेछ ।
