१५ असार २०८३, सोमबार
भारत सरकारको ३.६ करोड (नेरू) आर्थिक सहयोगमा कैलालीमा एक विद्यालय भवन बन्ने भएको छ ।
धनगढी उपमहानगरपालिका-१२ मा रहेको सिद्धनाथ माध्यमिक विद्यालयको भवन निर्माणका लागि भारत सरकारले उक्त सहयोग गरेको हो । विद्यालय भवनको सोमबार भारतीय राजदूतावास, काठमाडौंका प्रथम सचिव नारायण सिंहले शिलान्यास गरे ।
विद्यालय भवनको निर्माण कार्य उच्च प्रभाव सामुदायिक विकास परियोजना धनगढी उपमहानगरपालिका, कैलालीमार्फत कार्यान्वयन गरिने भारतीय दूतावासले जनाएको छ ।
शिलान्यास कार्यक्रममा धनगढी उपमहानगरपालिकाका मेयर गोपाल हमाल तथा अन्य सरोकारवालाले भारत सरकारद्वारा प्रदान गरिँदै आएको विकास सहयोगको प्रशंसा गरे ।
उनीहरूले नयाँ संरचनाले धनगढी उपमहानगरपालिका, कैलालीका विद्यार्थी र शिक्षकका लागि सिकाइको वातावरण सुदृढ बनाउन मद्दत पुग्ने विश्वास व्यक्त गरे ।
नजिकका छिमेकीको रूपमा भारत र नेपालबीच व्यापक र बहुक्षेत्रीय सहकार्य रहँदै आएको छ ।
उच्च प्रभाव सामुदायिक विकास परियोजनाको कार्यान्वयनले प्राथमिकताका क्षेत्रमा पूर्वाधार विकास गर्नुका साथै विकास र समृद्धिलाई अगाडि बढाउने नेपाल सरकारको प्रयासलाई सुदृढ पार्न भारत सरकारको निरन्तर सहयोगलाई प्रतिबिम्बित गर्ने दूतावासले जनाएको छ ।
