सरकारका नीति तथा कार्यक्रममाथि संसद्‌मा उठेका प्रश्नको जवाफ दिन प्रधानमन्त्री वालेन्द्र शाह (बालेन) उपस्थित हुनुपर्ने माग गर्दै विपक्षी दलले प्रतिनिधिसभामा अवरोध गरेका छन् ।

सरकारको नीति तथा कार्यक्रममाथिको छलफल सकिएपछि सभामुख डोलप्रसाद अर्यालले अर्थमन्त्री डा. स्वर्णिम वाग्लेलाई प्रधानमन्त्रीको तर्फबाट जवाफ दिन समय दिएपछि विपक्षी दलले विरोध जनाएका हुन् ।

सभामुखसँग समय लिएर नेपाली कांग्रेस संसदीय दलकी प्रमुख सचेतक बासना थापाले प्रधानमन्त्री बाहेकको जवाफ नसुन्ने बताइन् ।

‘प्रधानमन्त्रीलाई यो सदनले देख्न नपाउने हो, सुन्न नपाउने हो ? यो सभामुखकै अपमान होइन र ?’ थापाले भनिन्, ‘प्रधानमन्त्रीलाई बोलाउन सभामुखको रुलिङ चाहन्छौं, सदनमा बोलाइयोस् । प्रधाननमन्त्री नआउँदासम्म अवरोध रहन्छ ।’

नेकपा एमालेका ऐन महर, नेकपाका युवराज दुलाल, श्रम संस्कृति पार्टीका आरेन राईले बालेन संसद्‌मा आएर जवाफ दिनुपर्ने बताए ।