झापाको मेचीनगर नगरपालिका–६ काँकडभिट्टा सीमा क्षेत्रबाट सशस्त्र प्रहरी बल र भन्सार कार्यालयको संयुक्त टोलीले आधा किलोभन्दा बढी सुनसहित एक भारतीय नागरिकलाई पक्राउ गरेको छ ।

भारतबाट सिटी सफारीमार्फत नेपालतर्फ आउँदै गरेका भारत घर बताउने अन्दाजी ३९ वर्षीय परम पाठकलाई ५७० ग्राम सुन तथा विदेशी मुद्रासहित नियन्त्रणमा लिइएको सशस्त्र प्रहरीले जनाएको छ ।

विशेष सूचनाका आधारमा खटिएको सशस्त्र प्रहरी बल नेपाल सीमा सुरक्षा गुल्म काँकडभिट्टा र मेची भन्सार कार्यालयको संयुक्त टोलीले जाँच गर्ने क्रममा उनको साथबाट अमेरिकी डलर २० हजार, भारतीय रुपैयाँ ८५ हजार ४१०, भारतीय आधार कार्ड १ थान, विभिन्न ब्रान्डका मोबाइल सेट २ थान, हार्ड डिस्क १ थान, बैंक चेक १ थान तथा सिमकार्ड ७ वटा समेत बरामद गरेको हो ।

पक्राउ परेका पाठकलाई बरामद सुन तथा अन्य सामानसहित आवश्यक कारबाहीका लागि मेची भन्सार कार्यालय काँकडभिट्टा बुझाइएको छसशस्त्र प्रहरीले जनाएको छ ।