२८ जेठ २०८३, बिहीबार
सत्तारुढ राष्ट्रिय स्वतन्त्र पार्टी (रास्वपा)का सांसद डा. अमरेशकुमार सिंहले सरकारप्रति जनतामा असन्तुष्टि बढेको बताएका छन् । मधेश विस्फोटको स्थितिमा रहेको उनले बताए ।
बजेटका सिद्धान्त र प्राथमिकतामाथि मंगलबार प्रतिनिधिसभामा भएको छलफलमा भाग लिँदै अमरेशले मधेशमा असन्तुष्टि रहेको बताएका हुन् । ‘म भर्खर हिजो मात्र आएँ, सरकारलाई विनम्रतापूर्वक आग्रह गर्छु । मधेश विस्फोटको स्थितिमा छ,’ उनले भने, विस्फोट हुनुभन्दा पहिले त्यसको उपचार गरौं । किनभने न सत्तामा उसको अनुहार छ, न कुनै नियुक्तिमा । यस्तो ढंगले राज्य चल्दैन ।’
सरकारको नीति तथा कार्यक्रम र बजेटका प्राथमिकतामा मधेशलाई प्राथमिकतामा नराखिएकोमा उनले असन्तुष्टि व्यक्त गरे ।
रास्वपाले मधेशबाट सबभन्दा बढी भोट पाए पनि मधेशको लाइफलाइन रहेको हुलाकी राजमार्गलाई प्राथमिकतामा नराखिएकोमा उनले आपत्ति जनाए ।
सांसद सिंहले नयाँका नाममा सबै परम्परा भत्काउन नमिल्ने बताए ।
बजेटका सिद्धान्तमाथिको छलफलको क्रममा संसद्मा अर्थमन्त्री अनुपस्थित भएको भन्दै उनले नयाँका नाममा परम्परा भत्काउन नमिल्ने बताए ।
