१९ असार २०८३, शुक्रबार
प्रतिनिधिसभा नियमावली अनुसार संसद्मा प्रधानमन्त्रीको उपस्थिति माग गर्दै विपक्षी दलले प्रतिनिधिसभा बैठकमा विरोध गरेका छन् ।
नियमावलीमा रहेको प्रश्नोत्तर कार्यक्रम अनुसार प्रधानमन्त्रीलाई संसद्मा उपस्थित गराउन माग गर्दै विपक्षी दलले विरोध गरेका हुन् ।
बिहीबार प्रतिनिधिसभामा आकस्मिक, शून्य र विशेष समयपछि बैठक कार्यसूचीमा प्रवेश गर्ने बेला नेकपा एमाले, नेकपा र श्रम संस्कृति लगायतका विपक्षी दलका सांसद उठेर विरोध जनाएका हुन् ।
सभामुखसँग समय लिएर एमाले संसदीय दलका प्रमुख सचेतक ऐन महरले प्रत्येक महिनाको पहिलो साता प्रधानमन्त्रीसँग प्रश्नोत्तरको व्यवस्था भए पनि सो समय नतोकिएको भन्दै विरोध जनाएका हुन् ।
प्रधानमन्त्रीलाई झन् स्वेच्छाचारी बन्ने अवस्था सिर्जना भएको भन्दै उनले प्रधानमन्त्री सदनमा नआएसम्म सदनको कारबाही अगाडि बढ्न नसक्ने बताए ।
श्रम संस्कृति पार्टीका सचेतक आरेन राईले प्रधानमन्त्रीले सदनलाई छल्दा लोकतन्त्रमाथि नै खतरा हुन थालेको हो कि भनेर चिन्ता लागेको बताए ।
सरकारका नीति तथा कार्यक्रममाथिको छलफलको क्रममा पनि प्रधानमन्त्री बालेन नआएको भन्दै विपक्षी दलले विरोध जनाएका थिए ।
