रुपन्देहीको लुम्बिनी सांस्कृतिक नगरपालिका क्षेत्रमा नक्कली नेपाली नोट छाप्ने र कारोबार गर्ने गिरोहलाई प्रहरीले पक्राउ गरेको छ। 

इलाका प्रहरी कार्यालय लुम्बिनीबाट खटिएको टोलीले नक्कली नोट छाप्न प्रयोग गरिने कम्प्युटर, प्रिन्टर र अन्य सामग्रीसहित दुई जनालाई नियन्त्रणमा लिएको हो।
पक्राउ पर्नेहरूमा भारत, उत्तर प्रदेश सिद्धार्थनगरका ३८ वर्षीय अब्दुल हमिद र रुपन्देही लुम्बिनी सांस्कृतिक नगरपालिका वडा नं. ११ का २२ वर्षीय विकी भन्ने अनिल पासी रहेका छन्।
विशेष सूचनाका आधारमा जेठ ७ गते उनीहरूको लुक्ने ठाउँमा छापा मार्दा प्रहरीले ठूलो परिमाणमा नक्कली नोट र उपकरण फेला पारेको थियो। उनीहरूको साथबाट 'ङ २५ ०२४९१२' एउटै नम्बर रहेका ५०० दरका ३० थान नक्कली नोट बरामद भएको छ। यस्तै, कटिङ गर्न बाँकी रहेका १००, ५०० र १००० दरका ७ थान प्रिन्टेड पानाहरू पनि फेला परेको प्रहरीले जनाएको छ । 

जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक कृष्ण कुमार चन्दका अनुसार, पक्राउ परेका व्यक्तिहरूमाथि मुद्रा सम्बन्धी कसूरमा थप अनुसन्धान भइरहेको छ।