११ साउन २०८३, सोमबार
अमेरिकी राष्ट्रपति डोनाल्ड ट्रम्प ह्वाइट हाउसमै रहेका बेला शनिबार साँझ ह्वाइट हाउस नजिकैको सुरक्षा जाँच चौकीमा गोली चलेको छ । उक्त घटनामा एक संदिग्धको प्रहरीको जवाफी कारबाहीमा मृत्यु भएको छ ।
अमेरिकी गोप्य सुरक्षा निकाय सिक्रेट सर्भिसका अनुसार एक व्यक्ति ह्वाइट हाउस नजिक १७ औं स्ट्रिट र पेन्सिल्भेनिया एभिन्युस्थित सुरक्षा जाँच चौकीमा पुगेका थिए । उनले आफ्नो झोलाबाट बन्दुक निकालेर सुरक्षाकर्मीमाथि गोली चलाउन थालेपछि प्रहरीले जवाफी फायर गरेको थियो ।
सिक्रेट सर्भिसले जारी गरेको विज्ञप्तिअनुसार गोली लागेर घाइते भएका संदिग्धलाई अस्पताल लगिएको थियो, जहाँ उपचारका क्रममा उनको मृत्यु भएको हो ।
घटनाका क्रममा एक सर्वसाधारण पनि गोली लागेर घाइते भएका छन् । तर उनलाई लागेको गोली कसले चलाएको थियो भन्ने अझ स्पष्ट नभएको अमेरिकी सञ्चारमाध्यमहरूले जनाएका छन् । घाइतेको अवस्था पनि खुलाइएको छैन ।
रोयटर्ससँग कुरा गर्दै एक कानून कार्यान्वयन अधिकारीले ती संदिग्ध मानसिक रूपमा अस्थिर व्यक्ति रहेको बताएका छन् । उनका अनुसार ती व्यक्तिविरुद्ध यसअघि ‘स्टे-अवे अर्डर’ अर्थात् निश्चित क्षेत्र नजिक नजान आदेशसमेत जारी गरिएको थियो ।
घटनामा कुनै पनि सुरक्षाकर्मी घाइते नभएको सिक्रेट सर्भिसले जनाएको छ ।
