०७ साउन २०८३, बिहीबार
नेपाली कांग्रेसका नेता डा. शेखर कोइरालाले पार्टीभित्र एकता कायम गर्दै १५ औं महाधिवेशनलाई सहमतिमार्फत अघि बढाउन भन्दै पाँचबुँदे प्रस्ताव अघि सारेका छन् ।
कोइरालाले क्रियाशील सदस्यता, केन्द्रीय कार्यसमिति समायोजनदेखि विभिन्न समितिको गठनसम्मका विषयमा साझा समझदारी कायम गर्नुपर्ने प्रस्ताव राखेका हुन् ।
उनले १५ औं महाधिवेशनका लागि क्रियाशील सदस्यता अद्यावधिकलाई अनिवार्य नगर्नुपर्ने प्रस्ताव गरेका छन् । साथै, १४ औं महाधिवेशनपछि नवीकरण र वितरण भएका क्रियाशील सदस्यताकै आधारमा १५ औं महाधिवेशन सम्पन्न गर्नुपर्ने उनको धारणा छ ।
कोइरालाले १४ औं महाधिवेशनबाट निर्वाचित केन्द्रीय कार्यसमिति र विशेष महाधिवेशनबाट बनेको केन्द्रीय कार्यसमितिलाई समायोजन गरेर एउटै संरचना बनाउनुपर्ने प्रस्ताव पनि अघि सारेका छन् ।
त्यस्तै, उनले कार्यसम्पादन समितिमा सभापतिको बहुमत सुनिश्चित हुनेगरी गठन गर्नुपर्ने उल्लेख गरेका छन् ।
निर्वाचन समिति, क्रियाशील सदस्यता छानबिन समिति, अनुशासन समिति, विधान समिति तथा अन्य महत्वपूर्ण समितिहरू आपसी सहमतिका आधारमा मात्रै गठन गर्नुपर्ने प्रस्ताव पनि कोइरालाले अघि सारेका छन् ।
यस्ता छन् कोइरालाका प्रस्ताव :
१. १५ औं महाधिवेशनको लागि क्रियाशील सदस्यता अद्यावधिकलाई अनिवार्य (mandatory) नगर्ने ।
२. १४ औं महाधिवेशन पछाडि नवीकरण गरिएका र वितरण गरिएका क्रियाशील सदस्यताकै आधारमा १५ औं महाधिवेशन गर्ने ।
३. १४ औं महाधिवेशनको केन्द्रीय कार्यसमिति र विशेष महाधिवेशनको केन्द्रीय कार्यसमितिलाई समायोजन गरेर एउटै बनाउने ।
४. कार्यसम्पादनमा सभापतिको बहुमत हुनेगरी गठन गर्ने ।
५. निर्वाचन समिति, क्रियाशील छानबिन समिति, अनुशासन समिति, विधान समिति र अन्य समितिहरू आपसी सहमतिबाट मात्रै बनाउने ।
