विपक्षी दलहरूको विरोधपछि प्रतिनिधिसभाको बैठक १५ मिनेटका लागि स्थगित भएको छ।

सभामुख डोलप्रसाद (डीपी) अर्यालले बैठक १५ मिनेटका लागि स्थगित भएको जानकारी दिए ।

आजको बैठक नियमित कार्यसूचीमा प्रवेश गर्ने बित्तिकै विपक्षी दलहरूले उठेर विरोध जनाएका थिए ।

विपक्षी बेन्चमा रहेका सांसदहरूलाई आसन ग्रहण गर्न आग्रह गर्दै सभामुख अर्यालले बैठकको कार्यसूची अघि बढाउन सहयोग गर्न आग्रह गरेका थिए । 'सरकार र प्रधानमन्त्रीसँग मेरो छलफल भइरहेको छ, प्रधानमन्त्री सदनमा आउने तयारीमा हुनुहुन्छ, सदनमा छलफल भएको विषयमा प्रधानमन्त्री जानकार हुनुहुन्छ,' उनले भने ।

आजको बैठकमा आकस्मिक, शून्य र विशेष समयपश्चात् विपक्षी दलहरूले विरोध शुरू गरेका थिए ।

बैठकमा संस्कृति, पर्यटन तथा नागरिक उड्डयन मन्त्री खडकराज पौडेलले प्रस्तुत गरेको ‘पर्यटन विधेयक, २०८३ माथि विचार गरियोस्’ भन्ने प्रस्तावमाथिको छलफलमा सांसद अशोकुमार चौधरी, सुशील खड्का र जगदीश खरेलले भाग लिइरहँदा समेत विपक्षी दलको विरोध कायमै रह्यो ।

लगातार विरोध भएपछि सभामुख अर्यालले बैठक १५ मिनेटका लागि स्थगन गरेका हुन् ।