सरकारले डिजिटल भुक्तानीमार्फत् वस्तु तथा सेवा खरिद गर्ने उपभोक्तालाई मूल्य अभिवृद्धि कर (भ्याट)को १० प्रतिशत रकम बिजक जारी भएकै समयमा फिर्ता हुने व्यवस्था कार्यान्वयन गर्ने घोषणा गरेको छ ।

संघीय संसद्अन्तर्गत प्रतिनिधिसभा र राष्ट्रियसभाको संयुक्त बैठकमा शुक्रबार आर्थिक वर्ष २०८३/०८४ को बजेट प्रस्तुत गर्दै अर्थमन्त्री डा. स्वर्णिम वाग्लेले यसअघि नै व्यवस्था गरिए पनि कार्यान्वयनमा आउन नसकेको भ्याट फिर्ता प्रणालीलाई आगामी वर्षदेखि लागू गरिने बताएका हुन् ।

अर्थमन्त्री वाग्लेका अनुसार डिजिटल भुक्तानीको माध्यमबाट उपभोक्ताले खरिद गर्दा बिजक जारी भएकै समयमा भ्याटको १० प्रतिशत छुट प्राप्त गर्ने व्यवस्था लागू गरिनेछ ।

सरकारले २०७६ सालमै भ्याट फिर्ताको व्यवस्था गरेको भए पनि हालसम्म कार्यान्वयन हुन सकेको थिएन । आगामी आर्थिक वर्षको बजेटमार्फत उक्त व्यवस्थालाई तत्काल फिर्ता हुने प्रणालीसहित कार्यान्वयनमा ल्याइने घोषणा गरिएको हो ।