रूपन्देहीको देवदहमा माइक्रो बसको ठक्करबाट मोटरसाइकलमा सवार दुई जना घाइते भएका छन् ।

पूर्व-पश्चिम राजमार्गअन्तर्गत बुटवल नजिकै माइक्रो बसले भारतीय नम्बर प्लेटको मोटरसाइकललाई ठक्कर उनीहरू गम्भीर घाइते भएका हुन् । 

रूपन्देही देवदह नगरपालिका–१४ चरङगे नजिकै बुटवलबाट खैरेनीतर्फ जाँदै लु १ ख ९३५४ नम्बरको बसले सोही दिशातर्फ जाँदै गरेको यूपी ५६ एके ००४६ नम्बरको मोटरसाइकललाई पछाडिबाट ठक्कर दिँदा पश्चिम नवलपरासी रामग्राम नगरपालिका–१४ का २१ रामकृष्ण यादव र २८ वर्षका श्याम यादव घाइते भएका हुन् ।

उनीहरूको बुटवलस्थित लुम्बिनी प्रादेशिक अस्पतालमा उपचार भइरहेको छ।

इलाका प्रहरी कार्यालय बुटवलका डीएसपी निशान्त श्रीवास्तवले गाडी चालक बुटवल उपमहानगरपालिका–३ गोलपार्क बस्ने नारायण भण्डारीलाई प्रहरीले नियन्त्रणमा लिएको बताए ।

दुर्घटनाको कारण खोजी भइरहेको डीएसपी श्रीवास्तवको भनाइ छ।